ວັນ

ຜົ້ງສາລີ ປຽບຄືດັ່ງສະຫວັນສັ່ງ ວິມານດ່ານແດນພູດອຍ ເປັນດິນແດນວິລະຊົນ ຮັກຄອນພົງພັນເຊື້ອ ງາມເຫຼືອຫຼາຍພູຟ້າ ທະເລຫຼວງໝອກໃຫຍ່ ເຊີນຊີມປາພູຟ້າ ດື່ມເຫຼົ້າຂຽວເອ່ວສະຖານທີ່ ເບີ່ງຮີດຄອງປະເພນີ ເອກະລັກຫຼາຍເຜົ່າເຊື້ອ ເປັນຂອງຕ້ອນທ່ານຜູ້ຊົມ

ປາຖະກະຖາ ວັນສ້າງຕັ້ງສະຫະພັນນັກຮົບເກົ່າ ແຫ່ງຊາດລາວ ຄົບຮອບ 18 ປີ ແລະ ວັນຊາດ ສາທາລະນະລັດ ສັງຄົມນິຍົມຫວຽດນາມ ຄົບຮອບ 75 ປີ

ໃນຕອນເຊົ້າຂອງວັນທີ່ 9 ກັນຍາ 2020 ນີ້, ຢູ່ທີ່ຫ້ອງປະຊຸມຊັ້ນ 5 ຂອງຫ້ອງວ່າການແຂວງຜົ້ງສາລີ ( ເທດສະບານເມືອງບຸນເໜືອ ) ໄດ້ຈັດໃຫ້ມີພິທີ ປາຖະກະຖາວັນສ້າງຕັ້ງສະຫະພັນນັກຮົບເກົ່າແຫ່ງຊາດລາວ ຄົບຮອບ 18 ປີຄື: ( 9 ກັນຍາ 2002 - 9 ກັນຍາ 2020 ) ແລະ ວັນຊາດສາທາລະນະລັດສັງຄົມນິຍົມຫວຽດນາມຄົບຮອບ 75 ປີ ຄື: (02/09/1945 –02/09/2020) ຂື້ນຢ່າງເປັນທາງການ ໂດຍການເຂົ້າຮ່ວມເປັນປະທານ ແລະ ເລົ່າປະຫວັດມຼນເຊື້ອຂອງສອງວັນດັ່ງກ່າວໂດຍແມ່ນທ່ານ ແພງ ສຸລິເປົາ ຮອງຫົວໜ້າຄະນະໂຄສະນາອົບຮົມແຂວງ.

ເຊີ່ງທ່ານໄດ້ຍົກໃຫ້ເຫັນການເຕີ່ມໃຫຍ່ຂະຫຍາຍຕົວຂອງສອງວັນດັ່ງກ່າວ. ການກຳເນີດ ແລະ ເຕີບໃຫຍ່ຂະຫຍາຍຕົວຂອງສະຫະພັນນັກຮົບເກົ່າແຫ່ງຊາດລາວ ສະຫະພັນນັກຮົບເກົ່າແຫ່ງຊາດລາວ ແມ່ນໄດ້ຮັບການສ້າງຕັ້ງຂຶ້ນ ໃນປີ 2002 ຕາມມະຕິຕົກລົງຂອງກົມການ ເມືອງສູນກາງພັກ ສະບັບເລກທີ 68/ກມສພ, ລົງວັນທີ 9/9/2002 ຄະນະບໍລິຫານງານໄດ້ຮັບການບົງໂຕ ຈຳ ນວນ 13 ສະຫາຍ, ໃນນັ້ນ ໄດ້ບົງໂຕ ສະຫາຍ ພົນໂທ ນະຄອນ ສີສະນົນ ເປັນປະທານ; ຈາກນັ້ນ ກໍໄດ້ພ້ອມ ກັນ ເລັ່ງສຸມໃສ່ປັບປຸງສ້າງຕັ້ງສະຫະພັນນັກຮົບເກົ່າຂັ້ນແຂວງ ແລະເມືອງໃນທົ່ວປະເທດ ສຳເລັດໃນປີ 2003 ແລະພ້ອມ ກັນສຶບຕໍ່ປັບປຸງການຈັດຕັ້ງ, ແບບແຜນວິີເຮັດວຽກ ພ້ອມທັງສຶບຕໍ່ກະກຽມດຳເນີນກອງປະຊຸມຂັ້ນທ້ອງຖິ່ນໃຫ້ສຳ ເລັດ ແລະກ້າວເຂົ້າສູ່ການດຳເນີນກອງປະຊຸມໃຫຍ່ຜູ້ແທນນັກຮົບເກົ່າທົ່ວປະເທດ ຈາກນັ້ນຮອດປະຈຸບັນ ສາມາດ ດຳເນີນກອງປະຊຸມໃຫຍ່ມາແລ້ວ 3 ຄັ້ງ.

ເຊີ່ງຖັນແຖວສະຫະພັນນັກຮົບເກົ່າແມ່ນນາຍທະຫານ, ນາຍຕຳຫຼວດ ຂອງກຳລັງປະກອບອາວຸດປະຕິວັດທີ່ພັກຜ່ອນ ບຳນານ, ບຳເນັດ; ແມ່ນຜູ້ໄດ້ຜ່ານການປະຕິບັດໜ້າທີ່ເປັນນັກຮົບປ້ອງກັນຊາດ-ປ້ອງກັນຄວາມສະຫງົບ ແລະ ຜ່ານການທົດສອບໃນແປວໄຟສົງຄາມແຫ່ງການຕໍ່ສູ້ກູ້ຊາດ ແລະ ນຳເອົາເອກະລາດ, ຄວາມຢູ່ເຢັນເປັນສຸກມາໃຫ້ປະຊາຊົນລາວບັນເຜົ່າ; ເປັນຜູ້ມີບົດຮຽນໃນການຊີ້ນຳ-ບັນຊາ, ການກໍ່ສ້າງຮາກຖານການເມືອງ, ຂົນຂວາຍປຸກລະດົມປະ ຊາຊົນ ແລະ ຊຳນິນານໃນການປັບປຸງກໍ່ສ້າງກຳລັງ; ເປັນຜູ້ທີ່ບໍລິສັດ ແລະ ຈົ່ງຮັກພັກດີຕໍ່ພັກ, ຕໍ່ປະຊາຊົນ, ອັນນີ້ແມ່ນຈຸດພິເສດອັນໂດດເດັ່ນ ຂອງນັກຮົບເກົ່າ ຊິ່ງມີຄວາມແຕກຕ່າງກັບຊັ້ນຄົນອື່ນ ໃນສັງຄົມລາວປະຈຸບັນ.

ສ່ວນວັນຊາດສາທາລະນະລັດສັງຄົມນິຍົມຫວຽດນາມ ແມ່ນ ໄດ້ສາທາປະນາ ວັນທີ 2/9/1945 ປະຊາຊົນຊາວຫວຽດນາມໄດ້ໂຮມຊຸມນຸມມິດຕິງທີ່ສະໜາມຫຼວງບາດິງ, ປະທານໂຮ່ຈີມິນຕາງໜ້າໃຫ້ຄະນະລັດຖະບານຊົ່ວຄາວໄດ້ອ່ານຖະແຫຼງການເອກະລາດ, ປະກາດສ້າງຕັ້ງສາທາລະນະລັດ ປະຊາທິປະໄຕຫວຽດນາມ.

ໄຊຊະນະຂອງການປະຕິວັດເດືອນສິງຫາ 1945 ໄດ້ມີຄວາມໝາຍສຳຄັນຫຼາຍເພາະວ່າ: ໄດ້ເຮັດໃຫ້ລະບອບການປົກຄອງລ່າເມືອງຂຶ້ນແລະສະຫະພັນອາລັກຂາຂອງຝຣັ່ງໄດ້ສິ້ນສຸດລົງ, ໄດ້ລົບລ້າງລະບອບລ່າເມືອງຂຶ້ນ ແລະ ສັກດີນາ, ເປີດສັກກະລາດໃໝ່ໃນປະຫວັດສາດຂອງຊາດເຊິ່ງແມ່ນສັກກະລາດເອກະລາດແຫ່ງຊາດແລະລັດທິສັງຄົມນິຍົມ, ໄຂຍຸກສະໄໝໃໝ່ຂອງການປະຕິວັດເຊິ່ງມີປະທານໂຮ່ຈີ່ມິນເປັນຜູ້ນຳພາ. ປະເທດສາທາລະນະລັດ ປະຊາທິປະໄຕ ຫວຽດນາມ( ປະຈຸບັນ, ສາທາລະນະລັດສັງຄົມນິຍົມຫວຽດນາມ ) ໄດ້ຮັບການສ້າງຕັ້ງຂຶ້ນຢ່າງເປັນທາງການ ແລະ ກໍ່ສ້າງເປັນລັດສັງຄົມນິຍົມລັດທຳອິດໃນຂົງເຂດອາຊີ, ໄຊຊະນະຂອງການປະຕິວັດເດືອນສິງຫາຂອງຫວຽດນາມ ມັນແມ່ນໄຊຊະນະຄັ້ງທຳອິດຂອງລັດທິມາກ- ເລນິນ ຢູ່ໃນປະເທດໜຶ່ງທີ່ເປັນຫົວເມືອງຂຶ້ນ ແລະ ເຄິ່ງສັກດີນາ, ມັນເເມ່ນໄຊຊະນະຂອງແນວຄິດ, ແນວທາງປະຕິວັດຊາດ - ປະຊາທິປະໄຕຂອງປະທານໂຮ່ຈີ່ມິນ ແລະ ພັກກອມມູນິດຫວຽດນາມ, ແມ່ນການປະຕິວັດປົດປ່ອຍຊາດທີ່ພົ້ນເດັ່ນໃນສະຕະວັດທີ XX.

ຈຸດປະສົງຂອງການປາຖະກະຖາ ຄັ້ງນີ້່ກໍ່ເພື່ອແນ່ໃສ່ເຮັດໃຫ້ພະນັກງານຫຼັກແຫຼ່ງໄດ້ຮຽນຮູ້ເຖີ່ງການເຕີບໃຫຍ່ ຂະຫຍາຍຕົວຂອງສະຫະພັນນັກຮົບເກົ່າ ແລະ ວັນຊາດສາທາລະນະລັດສັງຄົມນິຍົມຫວຽດນາມ ແລະ ກຳແໜ້ນເອົາບາງບົດຮຽນທີ່ກ່ຽວພັນກັບຕົນເອງໄປຜັນຂະຫຍາຍໃນວຽກງານໃຫ້ມີຜົນສຳເລັດ.

ເຂົ້າຮ່ວມຮັບຟັງການປາຖະກະຖາໃນຄັ້ງນີ້ມີບັນດາທ່ານຫົວໜ້າ - ຮອງຫົວໜ້າພະແນກການ, ອົງການຈັດຕັ້ງມະຫະຊົນ ແລະ ພະນັກງານຫຼັກແຫລ່ງອ້ອມຂ້າງແຂວງເຂົ້າຮ່ວມທັງໝົດ 103 ທ່ານ, ຍີງ 55 ທ່ານ.

( ພາບ - ຂ່າວ : ແສງຄຳ ສາລີວັນ )