ວັນ

ຜົ້ງສາລີ ປຽບຄືດັ່ງສະຫວັນສັ່ງ ວິມານດ່ານແດນພູດອຍ ເປັນດິນແດນວິລະຊົນ ຮັກຄອນພົງພັນເຊື້ອ ງາມເຫຼືອຫຼາຍພູຟ້າ ທະເລຫຼວງໝອກໃຫຍ່ ເຊີນຊີມປາພູຟ້າ ດື່ມເຫຼົ້າຂຽວເອ່ວສະຖານທີ່ ເບີ່ງຮີດຄອງປະເພນີ ເອກະລັກຫຼາຍເຜົ່າເຊື້ອ ເປັນຂອງຕ້ອນທ່ານຜູ້ຊົມ

ສຳເລັດກອງປະຊຸມໃຫຍ່ ຜູ້ແທນຊາວໝຸ່ມ ທົ່ວແຂວງຜົ້ງສາລີ ຄັ້ງທີ IX

ກອງປະຊຸມໃຫຍ່ຜູ້ແທນຊາວໝຸ່ມທົ່ວແຂວງຜົ້ງສາລີ ຄັ້ງທີ IX ໄດ້ໄຂຂື້ນດ້ວຍບັນຍາກາດອັນຟົດຟື້ນ, ຜູ້ແທນມີຄວາມຮັບຜິດຊອບຢ່າງສູງ ແລະ ໄດ້ອັດລົງດ້ວຍຜົນສຳເລັດອັນຈົບງາມ ໃນຕອນບ່າຍຂອງວັນທີ່ 3 ສິງຫາ 2020 ຢູ່ທີ່ສະໂມສອນໃຫຍ່ຂອງເມືອງບຸນເໜືອ. ໂດຍພາຍໃຕ້ການເປັນປະທານຂອງສະຫາຍ ພອນສຸຈິດ ລິລາວົງ ກຳມະການພັກແຂວງ, ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງ, ເປັນກຽດເຂົ້າຮ່ວມຂອງສະຫາຍ ຄຳຜອຍ ວັັນນະສານ ຮັກສາການເລຂາພັກແຂວງ, ເຈົ້າແຂວງໆຜົ້ງສາລີ, ສະຫາຍ ບຸນຕາ ເທບພະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ມີບັນດາສະຫາຍກຳມະການປະຈຳພັກແຂວງ, ຜູ້ຊີ້ນຳອົງການຈັດຕັ້ງມາຫະຊົນຂັ້ນແຂວງ, ຜູ້ຕ່າງໜ້າຈາກອົງການຈັດຕັ້ງມະຫາຊົນຂັ້ນແຂວງ, ບັນດາທ່ານຮອງເຈົ້າເມືອງ, ແຂກເຊີນມາຈາກຄະນະພັກພະແນ​ກການອ້ອມຂ້າງແຂວງ, ຕາງໜ້າສະມາຊິກເຍົາວະຊົນທົ່ວແຂວງ ມີຜູ້ແທນສົມບູນຈຳນວນ 116 ສະຫາຍ, ຍິງ 31 ສະຫາຍ ທີ່ເປັນຕົວແທນໃຫ້ແກ່ສະມາຊີກຊາວໜຸ່ມທົ່ວແຂວງ 22.424 ສະຫາຍ.

ໃນກອງປະຊຸມ ສະຫາຍ ພອນສຸຈິດ ລິລາວົງ ກຳມະການພັກແຂວງ, ຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມແຂວງກໍ່ໄດ້ຂື້ນກ່າວໄຂກອງປະຊຸມຢ່າງເປັນທາງການ. ຈາກນັ້ນສະຫາຍ ທວນ ມະນີວົງ ຮອງ ເລຂາຄະນະບໍລິຫານງານຊາວໜຸ່ມແຂວງ ກໍໄດ້ຂື້ນຜ່ານບົດລາຍງານການເມືອງທັງສອງພາກ ໃນຊຸມປີຜ່ານ​ມາ ການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນຊາວໜຸ່ມທົ່ວແຂວງຜົ້ງສາລີ ຄັ້ງທີVIII. ໄດ້ຜ່ານຂະບວນຈັດຕັ້ງປະຕິບັດວຽກງານຕົວຈິງເຮັດໃຫ້ທຸກໆຂົງເຂດວຽກງານຊາວໜຸ່ມ - ເຍົາວະຊົນມີຜົນສໍາເລັດ ແລະ ໄດ້ຮັບການປັບປຸງ ແລະ ຂະຫຍາຍຕົວຂຶ້ນເລື້ອຍໆ, ເຖິງວ່າສະພາບການຂອງໂລກ ແລະ ພາກພື້ນຫຼືປະເທດໃກ້ຄຽງໄດ້ສືບຕໍ່ຜັນແປຢ່າງສະຫຼັບຊັບຊ້ອນດ້ວຍຫຼາຍຮູບການເຊິ່ງມີດ້ານບວກ ແລະ ດ້ານລົບ ທີ່ກະທົບເຖິງ ສະມາຊິກຊາວໜຸ່ມ-ເຍົາວະຊົນ ເປັນຕົ້ນແມ່ນວິກິດການທາງດ້ານເສດຖະກິດ, ໄພເງິນເຟີ້, ພະຍາດລະບາດ, ຄ່າຄອງຊີບມີການເໜັງຕິງເພີ້ມຂຶ້ນ, ບັນຫາຢາເສບຕິດ, ໄພທຳມະຊາດ, ພວກອິດທິກໍາລັງປໍລະປັກ ແລະ ພວກຄົນບໍ່ດີໄດ້ກໍ່ກວນປັ່ນປວນ. ໂດຍນໍາໃຊ້ບັນຫາສິ່ງບໍ່ດີຕ່າງໆ ເຊິ່ງພາໃຫ້ເກີດມີປະກົດການຫຍໍ້ທໍ້ຕ່າງໆໃນສັງຄົມ, ແຕ່ຖັນແຖວຊາວໜຸ່ມ-ໄວໜຸ່ມ, ເຍົາວະຊົນ-ອານຸຊົນ ຍັງຮັກສາໄດ້ຄຸນລັກສະນະມູນເຊື້ອອັນດີງາມຂອງຊາດ ກໍ່ຄືຊາວໜຸ່ມລາວ ເຊີດຊູຈິດໃຈເປັນເອກະລາດ, ເປັນເຈົ້າຕົນເອງເພິ່ງຕົນເອງ, ສ້າງຄວາມເຂັ້ມ ແຂງດ້ວຍຕົນເອງ ຕັ້ງໜ້າປະກອບສ່ວນໃນການຈັດຕັ້ງປະຕິບັດ 2 ໜ້າທີ່ຍຸດທະສາດຄື: ປົກປັກຮັກສາ ແລະ ສ້າງສາພັດທະນາປະເທດຊາດ. ໃນທົ່ວແຂວງມີຊາວໜຸ່ມ - ໄວໜຸ່ມໃນເກນອາຍຸ 15 - 35 ປີ ຈຳນວນ 40.827 ສະຫາຍ, ຍິງ 15.836 ສະຫາຍ.  ໃນນີ້ເຂົ້າເປັນສະມາຊິກຊາວໜຸ່ມທັງໝົດ 22.424 ສະຫາຍ, ຍິງ 7.382 ສະຫາຍ.

ມີຄະນະຮາກຖານ ແລະ ໜ່ວຍຮາກຖານທັງໝົດ 788 ຮາກຖານ ໃນນີ້ມີ 2 ຮາກຖານມີ 786 ໜ່ວຍຮາກຖານ. ພະແນກການອ້ອມຂ້າງແຂວງມີ 2 ຮາກຖານ, ມີ 46 ໜ່ວຍຮາກຖານຢູ່ຂັ້ນເມືອງມີ 740 ໜ່ວຍຮາກຖານ. ໂຮງຮຽນທີ່ມີອົງການຈັດຕັ້ງຊາວໜຸ່ມມີ 101 ໂຮງຮຽນ, ຊາວໜຸ່ມປ້ອງກັນຊາດ-ປ້ອງກັນຄວາມສະຫງົບມີ 2 ຮາກຖານ, ວຽກງານເງິນສະຕິສະມາຊິກຊາວໜຸ່ມໃນ 5 ປີ ຜ່ານມາ ສາມາດເກັບເງິນສະຕິສະມາຊິກຊາວໜຸ່ມໄດ້ທັງໝົດ 324.746.000 ກີບ. ໃນນີ້ພະແນກການອ້ອມຂ້າງແຂວງ ມີ 227.341.000  ກີບ ແລະ ບັນດາ 7 ເມືອງ 97.405.000 ກີບ. ໃນນີ້ ໄດ້ນຳໃຊ້ເຂົ້າໃນການຈັດຊື່ທຸງໄຊນຳໜ້າຂະບວນ 4 ບຸກ, ລົງຊຸກຍູ້ຂະບວນການ 4 ບຸກ, ສົມທົບບັນດາເມືອງຊື້ລົດຈັກ ແລະ ນຳໃຊ້ເຂົ້າໃນການເຄື່ອນໄຫວວຽກງານຊາວໜຸ່ມ-ເຍົາວະຊົນ. ວຽກງານເງິນກອງທຶນໃນ 5 ປີຜ່ານມາ ສາມາດຂະຫຍາຍເງິນກອງທຶນພັດທະນາຊາວໜຸ່ມຂັ້ນແຂວງ ແລະ ເມືອງໄດ້ທັງໝົດ 234.458.620 ກີບ. ມີສະມາຊິກກອງທຶນທັງໝົດ 2.152 ສະຫາຍ, ຍິງ 1.168 ສະຫາຍ. ໃນນີ້; ຂັ້ນແຂວງ ມີສະມາຊິກ 605 ສະຫາຍ, ຍິງ 217 ສະຫາຍ. ມີເງິນກອງທຶນ178.359​.206 ກີບ. ຂະບວນການ 4 ບຸກໄດ້ປະກາດຄະນະຊາວໜຸ່ມເມືອງ 4 ບຸກ ສຳເລັດ 7 ເມືອງ ແລະ ປະກາດມອບຮັບນາມມະຍົດທຸງໄຊນຳໜ້າ ຂະບວນການ 4 ບຸກ ໄດ້ 2 ເມືອງຄື: ເມືອງ ບຸນໃຕ້ ແລະ ເມືອງບຸນເໜືອ ແລະ ພະແນກການອ້ອມຂ້າງແຂວງໄດ້ຮັບຮ້ອງໜ່ວຍ 4 ບຸກ ຈຳນວນ 38 ໜ່ວຍ ແລະ ມອບຮັບນາມມະຍົດທຸງໄຊນຳໜ້າ ຂະບວນການ 4 ບຸກ ຈຳນວນ 22 ໜ່ວຍ. ກອງປະຊຸມໃຫ່ຍ ໄດ້ພ້ອມກັນຄົ້ນຄວ້າ, ຕົກລົງບັນຫາສຳຄັນ  ແລະ ຮັບຮອງເອົາຮ່າງລາຍງານການເມືອງທັງ II ພາກ ແລະ ຮ່າງບົດສໍາຫຼວດການນໍາພາລວມ ຂອງຄະນະບໍລິຫານງານຊາວໜຸ່ມແຂວງ ຊຸດທີ VIII, ໄດ້ຮັບຟັງການປະກອບຄຳເຫັນຈາກສະຫາຍ ເລຂາຄະນະບໍລີຫານງານຊາວໜຸ່ມເມືອງບູນເໜືອ ໃນການຈັດຕັ້ງປະຕິບັດເນື້ອໃນຂໍ້ແຂ່ງຂັນ 4 ບຸກ ແລະ ການຮັບຮອງນາມມະຍົດທຸງໄຊນຳໜ້າ 4 ບຸກ ແລະ ຍັງໄດ້ຮັບຟັງການລາຍງານຊາວໜຸ່ມຕົວແບບ ຮຽນດີ, ຮຽນເກັ່ງ ຈາກໂຮງຮຽນ ມສ ບ້ານໃໝ່.

ໃນກອງປະຊຸມ ສະຫາຍ ສັນຕິ ແກ້ວຍະສານ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຂື້້ນຜ່ານມາດຖານຂອງຜູ້ຮັບສະໜັກເລືອກຕັ້ງຄະນະບໍລິຫານງານຊາວໜຸ່ມແຂວງຊຸດໃໝ່ ກອງປະຊຸມໄດ້ພ້ອມກັນໃຊ້ສິດຂອງຕົນປ່ອນບັດເລືອກຕັ້ງເອົາຄະນະບໍລິຫານງານຊາວໜຸ່ມແຂວງຜົ້ງສາລີ ສະໄໝທີ IX ບົນພື້ນຖານຫຼັກການລວມສູນປະຊາທິປະໄຕ, ຖືກຕ້ອງຕາມມາດຖານ ແລະ           ເງື່ອນໄຂ ທີ່ກຳນົດໄວ້, ເຊິ່ງມີຜູ້ຮັບສະໝັກເລືອກຕັ້ງທັງໝົດ 33 ສະຫາຍ, ຍິງ 6 ສະຫາຍ ໃນນີ້ໄດ້ເລືອກເອົາ 29 ສະຫາຍ, ຍິງ 5 ສະຫາຍ ກອງປະຊຸມປະຖົມມະເລີກເລືອກເອົາ ຄະນະປະຈໍາ ຄະນະບໍລິຫານງານຊາວໜຸ່ມແຂວງ 7 ສະຫາຍ ແລະ ໄດ້ເຫັນດີເລືອກເອົາ  ສະຫາຍ ພອນສຸຈິດ ລີລາວົງ ເລຂາຄະນະບໍລິຫານງານຊາວໜຸ່ມແຂວງ ຄັ້ງທີ່ IX, ສະຫາຍ ທວນ ມະນີວົງ, ສະຫາຍ ສົມເພັງ ຍິນແສງ, ສະຫາຍ ນາງ ມະໄລຄໍາ ຈິນດາ ເປັນຮອງເລຂາ. ກອງປະຊຸມໄດ້ເລືອກເອົາຜູ້ແທນສົມບູນ ຈຳນວນ 15 ສະຫາຍ ແລະ ຜູ້ແທນສຳຮອງ 3 ສະຫາຍ ເພື່ອເຂົ້າຮ່ວມກອງປະຊຸມໃຫຍ່ ຄັ້ງທີ VIII ຂອງຜູ້ແທນຊາວໜຸ່ມທົ່ວປະເທດ.

ໃນກອງປະຊຸມທີ່ມີຄວາມໝາຍຄວາມສຳຄັນນີ່ ສະຫາຍ ຄຳຜອຍ ວັັນນະສານ ເຈົ້າແຂວງໆຜົ້ງສາລີ, ສະຫາຍ ບຸນຕາ ເທບພະວົງ ຮອງເລຂາຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ ກໍ່ໄດ້ມີຄຳເຫັນ ໂອ້ລົມ ຊຶ່ງທັງສອງສະຫາຍ ໄດ້ໃຫ້ທິດຊີ້ນຳວຽກງານແຕ່ລະດ້ານ ພ້ອມທັງຮຽກຮ້ອງໃຫ້ຄະນະຊຸດໃໝ່ ຈົ່ງສືບຕໍ່ຊີ້ນຳ-ນຳພາຈັດຕັ້ງປະຕິບັດມະຕິກອງປະຊຸມໃນຄັ້ງນີ້ ໃຫ້ມີຜົນສຳເລັດ ແລະ ຍິ່ງໃຫຍ່ກວ່າເກົ່າ ພ້ອມທັງເຊີດຊູນ້ຳໃຈຮັກຊາດ, ເປັນເຈົ້າຕົນເອງ, ເພິ່ງຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ແລະ ຍົກສູງການຈັດຕັ້ງປະຕິບັດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍ່ຄືແຂວງຜົ້ງສາລີ ໃຫ້ຫລຸດພົ້ນອອກຈາກຄວາມທຸກຢາກ ເທື່ອລະກ້າວ.

( ພາບ - ຂ່າວ: ແສງຄຳ ສາລີວັນ )