ວັນ

ພິທີເປີດຮ້ານ ຂາຍສີ້ນຄ້າ ຜະລິດຕະພັນຊົນເຜົ່າ ຂອງແຂວງຜົ້ງສາລີ

ໃນຕອນແລງຂອງວັນທີ່ 4 ກັນຍາ 2020 ນີ້, ຢູ່ທີ່ບ້ານໃໝ່, ເມືອງບຸນເໜືອ ໄດ້ຈັດໃຫ້ມີພິທີເປີດຮ້ານຂາຍສີ້ນຄ້າຜະລິດຕະພັນໂອດອບຂອງແຂວງຜົ້ງສາລີ ຂື້ນຢ່າງເປັນທາງການ. ໂດຍການເຂົ້າຮ່ວມຂອງທ່ານ ຄໍາຜອຍ ວັນນະສານ, ຮັກສາການເລຂາພັກແຂວງ-ເຈົ້າແຂວງຜົ້ງສາລີ, ມີບັນດາທ່ານ ກຳມະການປະຈຳພັກແຂວງ, ກຳມະການພັກແຂວງ, ແຂກເຊີນຈາກຄະນະກວດກາສູນກາງພັກ, ກະຊວງພາຍໃນ, ພະແນກການອ້ອມຂ້າງແຂວງ, ເຈົ້າເມືອງໆ ບຸນເໜືອ, ຜູ້ປະກອບການຕະຫຼອດຮອດພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ທະນູຄຳ ປິດຈະວົງ ຫົວໜ້າພະແນກອຸດສະຫະກຳ ແລະ ການຄ້າແຂວງຜົ້ງສາລີ ກໍ່ໄດ້ຂຶ້ນລາຍງານຫຍໍ້ ກ່ຽວກັບສະພາບການຊຸກຍູ້ສົ່ງເສີມເຄື່ອງຫັດຖະກໍາບັນດາເຜົ່າ ເຊີ່ງແຂວງຜົ້ງສາລີແມ່ນເປັນແຂວງໜຶ່ງ ທີ່ມີຫຼາຍຊົນເຜົ່າ: ປະກອບມີ 15 ຊົນເຜົ່າ, 34 ແຊງ ມີ: ຊົນເຜົ່າລື້, ເຜົ່າກຶມມຸ, ເຜົ່າພູນ້ອຍ, ເຜົ່າອາຄາ, ເຜົ່າຫໍ້, ເຜົ່າລາວ, ເຜົ່າໄທເໜືອ, ເຜົ່າຢັ້ງ, ເຜົ່າໄຕ, ເຜົ່າມົ້ງ, ເຜົ່າຮາຍີ, ເຜົ່າສີລາ, ເຜົ່າອິວມຽນ, ເຜົ່າບິດ ແລະ ເຜົ່າໂລໂລ, ຊຶ່ງແຕ່ລະເຜົ່າ ມີຄວາມເປັນເອກະລັກກັນສະເພາະທີ່ແຕກຕ່າງກັນ ບໍ່ວ່າຈະເປັນແບບແຜນດໍາລົງຊີວິດ, ການນຸ່ງຖື, ພາສາປາກເວົ້າ, ຮິດຄອງປະເພນີ ແລະອື່ນໆ. ແຕ່ວ່າໃນແຕ່ລະເຜົ່າແມ່ນມີຄວາມດຸໝັ່ນ, ຂະຫຍັນພຽນ ໃນການອອກແຮງງານ, ມີຫົວຄິດປະດິດສ້າງໃນການຜະລິດເປັນສິນຄ້າ, ມີສີໄມ້ລາຍມືໃນການຕໍ່າຫູກເຂັນຝ້າຍ, ທັກແຊ່ວ, ການຈັກສານ ແລະ ອື່ນໆ ຕາມພູມປັນຍາຂອງເຜົ່າທີ່ມີມາແຕ່ດຶກດໍາບັນ ທີ່ເປັນເອກະລັກໂດດເດັ່ນຂອງໃຜລາວ. ຊຶ່ງຜ່ານມາທາງການນໍາແຂວງໄດ້ວາງວິໄສທັດ ການທ່ອງທ່ຽວຕາມແລວ 4 ທາງອອກ ຕິດພັນກັບການສ້າງອາຊິບໃຫ້ປະຊາຊົນ ເປັນຕົ້ນ: ການ​ບໍ­ລິ­ການ​ທາງຜ່ານ, ໂຮງແຮມ, ຫານອາຫານ, ຫັດ­ຖະ­ກຳ​ທີ່​ເປັນ​ມູນ­ເຊື້ອ​ເຊັ່ນ, ການຕ່ຳ­ຫູກ​ທໍ​ໄໝ, ການ​ຈັກ­ສານ, ແກະສະລັກ ແລະ ​ການ​ປັ້ນ​ຫຼໍ່​ຕ່າງໆ ເພື່ອເປັນສິນຄ້າສົ່ງອອກກັບທີ່; ເຊິ່ງໄລຍະຜ່ານມາເຄື່ອງຫັດຖະກໍາຊົນເຜົ່າອາຄາປີລາໂຈ ໄດ້ມີມູນເຊື້ອ ເປັນຜະລິດຕະພັນເອກະລັກຂອງເມືອງບູນເໜືອ ທີ່ມີຫຼາດຢູ່ ຝະລັງ ແລະ ບັນດາປະເທດອາຊີຈໍານວນໜຶ່ງ; ນອກຈາກນີ້ ໃນປີ 2018 ເປັນຕົ້ນມາ ທາງໂຄງການ ECL ໄດ້ໃຫ້ການສະໜັບສະໜູນ ສູນຫັດຖະກໍາ ອອກພົບ ຕົກ ຢູ່ຫຼວງພະບາງ ເຂົ້າມາສົ່ງເສີມການຕໍ່າຫຸກທໍ່ໄໝ ແລະ ສົ່ງເສີມຜະລິດຕະພັນແຜນແຜ, ເຄື່ອງນຸ່ງຫົ່ມ ຈໍານວນໜຶ່ງ ຢູ່ບ້ານລົງທາງ ເມືອງບູນໃຕ້, ບ້ານ ຜາປູນ ເມືອງ ບູນເໜືອ ຕາມການລາຍງານຂໍ້ມູນຂອງສູນຫັດຖະກໍາ ແມ່ນເຫັນວ່າ ຜະລິດຕະພັນຂອງແຂວງຜົ້ງສາລີ ກໍເປັນທີ່ຍອມຮັບຂອງຕະຫຼາດຢູ່ພາຍໃນ ແລະ ຕ່າງປະເທດດີສົມຄວນ.

ປັດຈຸບັນຄະນະນໍາແຕ່ລະຂັ້ນຂອງແຂວງ ຈຶ່ງໄດ້ຖືສໍາຄັນ ແລະ ສ້າງເງື່ອນໄຂ ເອົາໃຈໃສ່ຊຸກຍູ້ສົ່ງເສີມ ແລະ ພັດທະນາເຄື່ອງຊົນເຜົ່າ ທີ່ເປັນເອກະລັກສະເພາະຂອງແຕ່ລະທ້ອງຖິ່ນ ກາຍເປັນສິນຄ້າປະເພດເຄື່ອງນຸ່ງຫົ່ມ, ແຜ່ນແພ, ເຄື່ອງໃຊ້ຊອຍຕ່າງໆ ຕິດພັນກັບການຕັ້ງຮ້ານຂາຍເຄື່ອງຊົນເຜົ່າສະເພາະ ເພື່ອໂຄສະນາສົ່ງເສີມການນໍາໃຊ້ສິນຄ້າພາຍໃນ ໂດຍສະເພາະແມ່ນ ເຄື່ອງຊົນເຜົ່າທີ່ມີຫຼາກຫຼາຍສີສັນ, ມີຄວາມປານີດ, ມີຄວາມສວຍງາມ, ມີສະເໜ່, ເປັນເອກະລັກ ແລະ ສັບສົມບັດອັນລໍ່າຄ່າ ທີ່ເປັນມໍລະດົກຕົກທອດມາຫຼາຍເຊັ່ນຄົນ ເພື່ອໃຫ້ຄົງຕົວຢູ່ກັບພວກເຮົາຕະຫຼອດໄປ.

ໃນໂອກາດນີ້ ທ່ານ ຄຳຜອຍ ວັນນະສານ ຮັກສາການເລຂາພັກແຂວງ, ເຈົ້າແຂວງຜົ້ງສາລີ ກໍ່ໄດ້ຂື້ນກ່າວມີຄຳເຫັນ ເຊີ່ງກ່ອນອື່ນທ່ານກໍ່ໄດ້ກ່າວສະແດງຄວາມຍ້ອງຍໍຊົມເຊີຍມາຍັງຂະແໜງການທີກ່ຽວຂ້ອງທີ່ໄດ້ເອົາໃຈໃສ່ສົ່ງເສີ່ມໃຫ້ພາກສ່ວນທຸລະກິດເຂົ້າມາມີສ່ວນຮ່ວມໃນການເປີດຮ້ານຂາຍສີ້ນຄ້າຜະລິດຕະພັນຊົນເຜົ່າຂອງແຂວງຜົ້ງສາລີ ແລະ ຍັງໄດ້ຮຽກຮ້ອງໃຫ້ຄະນະພັກ-ອົງການປົກຄອງແຕ່ລະຂັ້ນ ຈົ່ງສືບຕໍ່ຖືສໍາຄັນ ໃນການຊຸກຍູ້ສົ່ງເສີມການຜະລິດຕະພັນຂອງບັນ ດາເຜົ່າ ເປັນຕົ້ນ: ເຄື່ອງນຸ່ງຫົມ, ແຜນແຜ, ເຄື່ອງໃຊ້ຊອຍ ກາຍເປັນສິນຄ້າ (ໂອດອບ) ແລະ ພັດທະນາໃຫ້ມີຄຸນນະພາບ, ໄດ້ມາດຖານເທື່ອລະກ້າວ ແລະ ມີຄວາມຍືນຍົງ, ໃຫ້ອົງການປົກຄອງເມືອງ ເພີ່ມທະວີການຄົ້ນຄິດປະດິດສ້າງ ສິນຄ້າທີ່ເປັນເອກະລັກຂອງເຜົ່າ, ມູນເຊື້ອຂອງບ້ານ, ຂອງເມືອງ, ຂອງແຂວງໄດ້ຕາມມາຕະຖານ, ມີຄຸນນະພາບ ແລະ ມີຊື່, ມີເຄື່ອງໝາຍການຄ້າທີ່ຖືກຕ້ອງ ໃຫ້ເພີ່ມຂື້ນໃນແຕ່ລະປີ, ຮຽກຮ້ອງໃຫ້ທາງເຈົ້າຂອງຮ້ານ ຈົ່ງສືບຕໍເສີມຂະຫຍາຍໃນການຊອກຂໍ້ມູນຂ່າວສານທາງດ້ານຕະຫຼາດ ແລະ ເອົາຄວາມຕ້ອງການຂອງຕະຫຼາດ ລົງສູ່ການປັບປຸງຜະລິດຕະພັນຂອງຊົນເຜົ່າໃຫ້ຫຼາຍຂຶ້ນ ຮັບປະກັນທາງດ້ານປະລິມານ ແລະ ຄຸນນະພາບຂອງສິນຄ້າ ຕິດພັນກັບຕະຫຼາດພາຍໃນ ແລະ ຕ່າງປະເທດຢ່າງຍືນຍົງ.

ໃນໂອກາດທີ່ມີຄວາມໝາຍຄວາມສຳຄັນນີ້, ຄະນະປະທານພິທີຍັງໄດ້ພ້ອມກັນເປີດປ້າຍ ແລະ ລັນຂ້ອງ 9 ເປີດ ເພື່ອເປັນການເປີດຮ້ານຂາຍສີ້ນຄ້າຜະລິດຕະພັນຊົນເຜົ່າຂອງແຂວງຜົ້ງສາລີຢ່າງເປັນທາງການ.

( ພາບ - ຂ່າວ: ແສງຄຳ ສາລີວັນ )