ວັນ

ເມືອງບຸນເໜືອ ເປີດຮ້ານຂາຍສີ້ນຄ້າ ຜະລິດຕະພັນໂອດອບ ຂອງແຂວງຜົ້ງສາລີ

ໃນຕອນແລງຂອງວັນທີ່ 4 ກັນຍາ 2020 ນີ້, ຢູ່ທີ່ບ້ານໂພນໂຮມ, ເມືອງບຸນເໜືອ ໄດ້ຈັດໃຫ້ມີພິທີເປີດຮ້ານຂາຍສີ້ນຄ້າຜະລິດຕະພັນໂອດອບຂອງແຂວງຜົ້ງສາລີ ຂື້ນຢ່າງເປັນທາງການ. ໂດຍການເຂົ້າຮ່ວມຂອງທ່ານ ຄໍາຜອຍ ວັນນະສານ, ຮັກສາການເລຂາພັກແຂວງ-ເຈົ້າແຂວງຜົ້ງສາລີ, ມີບັນດາທ່ານ ກຳມະການປະຈຳພັກແຂວງ, ກຳມະການພັກແຂວງ, ແຂກເຊີນຈາກຄະນະກວດກາສູນກາງພັກ, ກະຊວງພາຍໃນ, ພະແນກການອ້ອມຂ້າງແຂວງ, ເຈົ້າເມືອງໆ ບຸນເໜືອ, ຜູ້ປະກອບການຕະຫຼອດຮອດພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ ທ່ານ ທະນູຄຳ ປິດຈະວົງ ຫົວໜ້າພະແນກອຸດສະຫະກຳ ແລະ ການຄ້າແຂວງຜົ້ງສາລີ ກໍ່ໄດ້ຂຶ້ນລາຍງານຫຍໍ້ ກ່ຽວກັບສະພາບການຊຸກຍູ້ສົ່ງເສີມ, ຄຸ້ມຄອງການຜະລິດສິນຄ້າທ່າແຮງ ແລະ ສິນຄ້າໂອດ໋ອບ ຂອງແຂວງ ເຊີ່ງທ່ານກ່າວວ່າ: ໄລຍະຜ່ານມາ ພັກ ແລະ ລັດຖະບານ ໄດ້ເອົາໃຈໃສ່ຊຸກຍູ້ສົ່ງເສີມ ວິສາຫະກິດຂະໜາດນ້ອຍ ແລະ ກາງ ຢ່າງຕັ້ງໜ້າ ແລະ ກາຍເປັນວາລະແຫ່ງຊາດ ດ້ວຍການວາງແນວທາງນະໂຍບາຍຢ່າງສົມສ່ວນ, ອອກນິຕິກໍາຫຼາຍສະບັບໃນການຄຸ້ມຄອງ, ວາງນະໂຍບາຍກອງທຶນ SME ແລະ ກໍ່ຍັງໄດ້ສ້າງພຶ້ນຖານໂຄງລ່າງ, ສ້າງປະຖົມປັດໃຈຫຼາຍຢ່າງ ເພື່ອເປັນເງື່ອນໄຂອໍານວຍຄວາມສະດວກໃຫ້ແກ່ຜູ່ປະກອບການ, ປະຊາຊົນບັນດາເຜົ່າ, ຮູ້ຈັກດໍາເນີນທຸລະກິດ ເຂົ້າໃນກິດ ຈະການປະເພດຕ່າງໆ ເພື່ອປະກອບອາຊີບທີ່ໝັ້ນຄົງ, ທັງເປັນການສ້າງວຽກເຮັດງານທໍາ, ສ້າງລາຍຮັບທີ່ແນ່ນອນ ເປັນຕົ້ນ: ທຸລະກິດການຄ້າ, ການບໍລິການ ແລະ ການລົງທຶນ ດ້ວຍການຮ່ວມທຸລະກິດ, ການສໍາພັນທາງທຸລະກິດ, ການຮຸ້ນສ່ວນ ຫຼື ວິສາຫະກິດສ່ວນບຸກຄົນ ແລະອື່ນໆ. ເຊິ່ງມາຮອດປະຈຸບັນມີ ຫົວໜ່ວຍທຸລະກິດທັງໝົດ: 2.177 ຫົວໜ່ວຍ ໃນນີ້: ຂະໜາດໃຫຍ່ 57 ຫົວໜ່ວຍ ກວມ 2,26 %, ຂະໜາດກາງ 164 ຫົວໜ່ວຍ ກວມ 7,68 %, ຂະໜາດນ້ອຍ 300 ຫົວໜ່ວຍ ກວມ14,05 % ແລະ ຈຸນລະວິສາຫະກິດ 614 ຫົວໜ່ວຍ ກວມ 57,59 %. ປະຈຸບັນ ແຂວງຜົ້ງສາລີ ມີສິນຄ້າ ໂອດອບທັງໝົດ 14 ກາໝາຍ, ກວມ 6% ຂອງທົ່ວປະເທດ, ລວມມີ 52 ປະເພດສິນຄ້າ. (ໃນປີ 2019-2020 ໄດ້ເພີ່ມ 6 ກາໝາຍ). ຜ່ານມາໄດ້ຊຸກຍູ້ສ້າງຕັ້ງຮ້ານຂາຍຜະລິດຕະພັນ ໂອດອບ ຢູ່ເທດສະບານເມືອງຜົ້ງສາລີ 1 ແຫ່ງ ໃນເດືອນ (ກໍລະກົດ 2019) ເຫັນວ່າການຂາຍສິນຄ້າຢູ່ຮ້ານດັ່ງກ່າວໄດ້ຮັບປະສິດທິຜົນດີສົມຄວນ ເຫັນໄດ້ແນວໂນ້ມທ່າຂະຫຍາຍຕົວດັ່ງກ່າວນັ້ນ ທາງພະແນກຈຶ່ງໄດ້ສົມທົບກັບຜູ່ປະກອບການ ແລະ ພາກສ່ວນທີ່ກ່ຽວຂ້ອງ ເປີດຮ້ານຂາຍຜະລິດຕະພັນ ໂອດອບ ແຫ່ງທີ່ 2 ຂຶ້ນຢູ່ເທດສະບານແຂວງໃໝ່. ການສ້າງຕັ້ງຮ້ານແບບນີ້ ກໍເພື່ອ ເປັນຕະຫຼາດໃນຕົວ ໃຫ້ແກ່ຜູ້ຜະລິດສິນຄ້າໂອດອບຢູ່ແຕ່ລະເມືອງ ແລະ ທັງເປັນການສ້າງເງື່ອນໄຂໃຫ້ແກ່ຜູ້ປະກອບການ ເພື່ອຂະຫຍາຍຖານການຕະຫຼາດອອກໄປສູ່ວົງກ້ວາງ ເປັນຕົ້ນ: ການເຈລະຈາກັບບັນດາຮ້ານສັບພະສິນຄ້າ, ມີນີມາດແກັດ, ຊູບເປີມາດແກັດ ແລະ ເຈລະຈາທາງການຄ້າກັບຕ່າງປະເທດ ໃນການສຶກສາຂໍ້ມູນທາງຕະຫຼາດມາສູ່ການຜະລິດໃຫ້ໄດ້ທັງປະລິມານ ແລະ ຄຸນນະພາບ ຫຼາຍຂຶ້ນ. ເພາະໄລຍະຜ່ານມາ ສິນຄ້າໂອດອບ ປະເພດຊາ ແມ່ນໄດ້ມີຕະຫຼາດ ຢູ່ຈີນ, ຮົງກົງ, ໄຕວັນ ແລະ ຢູ່ຍູຣົບຈໍານວນໜຶ່ງແລ້ວ ພິເສດ ປີ 2019 ທາງເຈົ້າຂອງໂຮງງານແສງຄໍາ ໄດ້ນໍາຜະລິດຕະພັນຊາປະປະກວດຢູ່ຮົງກົງ ເຊິ່ງມີບັນດາປະເທດເຂົ້າຮ່ວມ 150 ກ່ວາປະເທດ ໃນນັ້ນ: ຊາບູຮານແສງຄໍາ ກໍຄືຜະລິດຕະພັນຂອງແຂວງຜົ້ງສາລີ ໄດ້ອັນດັບທີ່ 1. (ຫຼຽນຄໍາ).

ໃນໂອກາດນີ້ ທ່ານ ຄຳຜອຍ ວັນນະສານ ຮັກສາການເລຂາພັກແຂວງ, ເຈົ້າແຂວງຜົ້ງສາລີ ກໍ່ໄດ້ຂື້ນກ່າວມີຄຳເຫັນເຊີ່ງກ່ອນອື່ນທ່ານກໍ່ໄດ້ກ່າວສະແດງຄວາມຍ້ອງຍໍຊົມເຊີຍມາຍັງຂະແໜງການທີກ່ຽວຂ້ອງທີ່ໄດ້ເອົາໃຈໃສ່ສົ່ງເສີ່ມໃຫ້ພາກສ່ວນທຸລະກິດເຂົ້າມາມີສ່ວນຮ່ວມໃນການເປີດຮ້ານຂາຍສີ້ນຄ້າຜະລິດຕະພັນໂອດອບຂອງແຂວງຜົ້ງສາລີ. ພ້ອມດຽວກັນນັ້ນທ່ານຍັງໄດ້ຮຽກຮ້ອງໃຫ້ຄະນະພັກ-ອົງການປົກຄອງ ແຕ່ລະຂັ້ນ ສືບຕໍ່ຖືສໍາຄັນ ໃນການຊຸກຍູ້ສົ່ງເສີມການຜະລິດເປັນສິນຄ້າ ແລະ ການສົ່ງເສີມສິນຄ້າ (ODOP) ແລະ ພັດທະນາໃຫ້ມີຄຸນນະພາບ, ໄດ້ມາດຖານເທື່ອລະກ້າວ ແລະ ມີຄວາມ ຍືນຍົງ,  ເອົາໃຈໃສ່ປຸກລະດົມ, ຊຸກຍູ້, ສົ່ງເສີມຂະບວນການຜະລິດເປັນສິນຄ້າ ທີ່ຕິດພັນກັບ 5 ທ່າແຮງຂອງແຂວງ-ຂອງເມືອງ ແລະ ຕິດພັນກັບ 6 ທາງອອກພັດທະນາເສດຖະກິດຂອງແຂວງ ໃຫ້ເກີດມີຫຼາຍປະເພດ, ຫຼາກຫຼາຍສີສັນຜະລິດຕະພັນຂອງແຕ່ລະກຸ່ມ, ແຕ່ລະເມືອງ, ໃຫ້ບັນດາເມືອງ ເພີ່ມທະວີການຄົ້ນຄິດປະດິດສ້າງສິນຄ້າ ທີ່ເປັນເອກະລັກຂອງເຜົ່າ, ມູນເຊື້ອຂອງບ້ານ, ຂອງ ເມືອງ, ຂອງແຂວງ ແລະໄດ້ຕາມມາຕະຖານ, ມີຄຸນນະພາບ ແລະມີຊື່, ມີເຄື່ອງໝາຍການຄ້າທີ່ຖືກຕ້ອງ ໃຫ້ເພີ່ມຂື້ນໃນແຕ່ລະປີ, ໃຫ້ບັນດາອົງການຈັດຕັ້ງພັກ-ລັດ, ອົງການຈັດຕັ້ງສັງຄົມ, ຫົວໝ່ວຍທຸລະກິດ ສືບຕໍ່ສະໜັບສະໜູນສົ່ງເສີມ ການ ຜະລິດເປັນສິນຄ້າ, ສິນຄ້າ (ODOP) ທັງສົ່ງເສີມການຊື້-ການຂາຍ ເພື່ອສ້າງອາຊີບ, ສ້າງວຽກເຮັດງານທໍາ ແລະ ສ້າງລາຍໄດ້ໃຫ້ປະຊາຊົນບັນດາເຜົ່າ ເພື່ອຫຼຸດພົ້ນອອກຈາກຄວາມທຸກຍາກເທື່ອລະກ້າວ, ຮຽກຮ້ອງໃຫ້ທຸກພາກສ່ວນທັງພາກລັດ ແລະ ເອກະຊົນຫັນມາຊົມໃຊ້ສິນຄ້າພາຍໃນໃຫ້ຫຼາຍຂຶ້ນ ເພື່ອເປັນການກະຕຸ້ນ ພາກທຸລະກິດຂະຫຍາຍຖານຜະລິດໃຫ້ມີຫຼາກຫຼາຍຜະລິດຕະພັນ ເປັນຕົ້ນ ຜະລິດເພື່ອຊົມໃຊ້ພາຍໃນ, ຜະລິດເພື່ອທົດແທນການນໍາເຂົ້າ ແລະ ຜະ ລິດເພື່ອສົ່ງອອກ ດ້ວຍການນໍາໃຊ້ນະວັດຕະກໍາ, ເຕັກນິກວິທະຍາສາດເຂົ້າໃນການຜະລິດ ເພື່ອຍົກສູງສະມັດຕະພາບຂອງສິນຄ້າ ຕິດພັນກັບຕະຫຼາດຢ່າງຍືນຍົງ.

ໃນໂອກາດທີ່ມີຄວາມໝາຍຄວາມສຳຄັນນີ້, ຄະນະປະທານພິທີຍັງໄດ້ພ້ອມກັນເປີດປ້າຍ ແລະ ລັນຂ້ອງ 9 ເປີດ ເພື່ອເປັນການເປີດຮ້ານຂາຍສີ້ນຄ້າຜະລິດຕະພັນໂອດອບຂອງແຂວງຜົ້ງສາລີຢ່າງເປັນທາງການ.

( ພາບ - ຂ່າວ: ແສງຄຳ ສາລີວັນ )