ວັນ

ແຂວງຜົ້ງສາລີ ສະຫຼຸບຕິລາຄາການຈັດຕັ້ງປະຕິບັດ ວຽກງານກໍສ້າງຮາກຖານ ການເມືອງ ແຕ່ປີ 2016 -2020 ແລະ ທິດທາງແຜນການ ແຕ່ປີ 2021 - 2025.

 

ໃນຕອນເຊົ້າຂອງວັນທີ່ 27 ພຶດສະພາ 2020 ນີ່, ຢູ່ທີ່ສະໂມສອນໃຫຍ່ຂອງເມືອງບຸນເໜືອ ໄດ້ຈັດໃຫ້ມີກອງປະຊຸມສະຫຼຸບຕິລາຄາການຈັດຕັ້ງປະຕິບັດວຽກງານກໍສ້າງຮາກຖານການເມືອງແຕ່ປີ 2016 -​ 2020 ​ແລະ ທິດທາງແຜນການແຕ່ປີ 2021 -​ 2025​ ຂື້ນຢ່າງເປັນທາງການ.​ ກອງປະຊຸມໂດຍພາຍໃຕ້ການເປັນປະທານຂອງຂອງທ່ານ ຄຳຜອຍ ວັນນະສານ ຮັກສາການເລຂາພັກແຂວງ,​ ເຈົ້າແຂວງໆຜົ້ງສາລີ,​ ເຂົ້າຮ່ວມມີບັນດາທ່ານກຳມະການປະຈຳພັກແຂວງ,​ ກຳມະການພັກແຂວງ,​ ເລຂາຄະນະພັກຮາກຖານ,​ ເລຂາໝ່ວຍພັກ, ຫົວໜ້າ ​- ຮອງຫົວໜ້າພະແນກການ,​ ກອງບັນຊາການປ​ກຊ - ​ປກສ,​ ເຈົ້າເມືອງ 7 ​ເມືອງ​ ແລະ ຄະນະຮັບຜິດຊອບວຽກງານກໍ່ສ້າງຮາກຖານການເມືອງຈາກ ​ຂັ້ນແຂວງ ແລະ ເມືອງ ຈາກ 7 ເມືອງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີກໍ່ໄດ້ແນະ​ນຳ​ກ່ຽວ​ກັບ​ມະ​ຕິ​ຂອງ​ກົມ​ການ​ເມືອງ​ສູນ​ກາງ​ພັກ ສະ​ບັບ​ເລກ​ທີ 107 – 108 ກມ​ສ​ພ ລົງ​ວັນ​ທີ 30 ເມ​ສາ 2020 ວ່າ​ດ້ວຍ​ການ​ພັດ​ທະ​ນາ​ນະ​ຄອນ​ຫຼວງວຽງ​ຈັນ​ໃນ​ໄລ​ຍະ​ໃໝ່ ແລະ ມະ​ຕິວ່າ​ດ້ວຍ​ວຽກ​ງານ​ແນວ​ໂຮມ ແລະ ວຽກ​ງານ​ມະຫາຊົນຂອງ​ພັກ​ໃນ​ໄລ​ຍະ​ໃໝ່. ຈາກນັ້ນ ທ່ານ ອຸ່​ຄຳ ຕຸ​ລາ​ພັນ ຮອງ​ຫົວ​ໜ້າ​ຫ້ອງວ່າ​ການ​ແຂວງ, ກໍ່​ໄດ້​ຜ່ານ​ບົດ​ລາຍ​ງານການຈັດຕັ້ງປະຕິບັດວຽກງານກໍສ້າງຮາກຖານການເມືອງແຕ່ປີ 2016 -​2020​ ແລະ ພ້ອມ​ທັງວາງທິດທາງແຜນການແຕ່ປີ 2021 -​ 2025. ເຊີ່ງ​ໃນ​ໄລ​ຍະ​ຜ່ານ​ມາຄະນະພັກແຕ່ລະຂັ້ນ ໄດ້ເອົາໃຈໃສ່ຊີ້ນໍາ-ນໍາພາວຽກງານກໍ່ສ້າງຮາກຖານການເມືອງດ້ວຍການຫັນພະນັກງານຫຼັກແຫຼ່ງຂອງແຂວງ, ເມືອງ ແລະ 2 ກໍາລັງ ລົງກໍ່ສ້າງຮາກຖານການເມືອງ ຕິດພັນກັບການປະຕິບັດວຽກງານ 3 ສ້າງ, ການຕິດຕາມ, ຊຸກຍູ້ ແລະ ປະເມີນໜ່ວຍພັກ, ອົງການຈັດຕັ້ງມະຫາຊົນຕາມມາດຖານເງື່ອນໄຂໃນແຕ່ລະປີ ແລະ ການກະກຽມດໍາເນີນກອງປະຊຸມໃຫຍ່ຂອງອົງການຈັດຕັ້ງພັກ, ອົງການຈັດຕັ້ງມະຫາຊົນເຮັດໃຫ້ລະບົບການເມືອງຢູ່ແຕ່ລະຂັ້ນໄດ້ຮັບການປັບປຸງດີຂຶ້ນເທື່ອລະກ້າວ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍດີ, ປະຊາຊົນທໍາມາຫາກິນ,  ພັດທະນາເສດຖະກິດຄອບຄົວເປັນປົກກະຕິ . ມາຮອດປີ 2020 ທົ່ວແຂວງມີຄະນະພັກຮາກຖານ 86 ໜ່ວຍ; ມີ 805  ໜ່ວຍພັກ, ມີສະມາຊິກພັກທັງໝົດ 12,375 ສະຫາຍ, ຍິງ 3,671 ສະຫາຍ, ໄດ້ຮັບຮອງເປັນໜ່ວຍພັກປອດໄສ, ເຂັ້ມແຂງ ແລະ ໜັກແໜ້ນ. ທົ່ວແຂວງມີ 328 ໜ່ວຍ; ທົ່ວແຂວງມີຮາກຖານກໍາມະບານ 340 ຮາກຖານ; ມີສະມາຊິກກໍາມະບານທັງໝົດ 7,135  ສະຫາຍ, ຍິງ 3,832 ສະຫາຍ,  ສະມາຊິກກໍາມະບານອາຊີບມີ 62 ສະຫາຍ, ຍິງ 33 ສະຫາຍ; ມີໜ່ວຍຊາວໜຸ່ມທັງໝົດ 788 ໜ່ວຍ, ມີສະມາຊິກຊາວໜຸ່ມທັງໝົດ 22,​424 ສະຫາຍ, ຍິງ 7,382 ສະຫາຍ, ສະມາຊິກຊາວໜຸ່ມ 4 ບຸກ 17,871 ສະຫາຍ, ຍິງ 4693 ສະຫາຍ; ມີໜ່ວຍສະຫະພັນແມ່ຍິງ 4,722 ໜ່ວຍ, ມີສະມາຊິກແມ່ຍິງທັງໝົດ 116,107 ສະຫາຍ; ມີສະມາຊິກນັກຮົບເກົ່າທັງໝົດ 1,870 ສະຫາຍ, ຍິງ 104 ສະຫາຍ; ມີຄະນະກໍາມະການແນວສູນກາງ9 ສະຫາຍ, ຍິງ 3 ສະຫາຍ, ຂັ້ນແຂວງມີ 63 ສະຫາຍ, ຍິງ 5 ສະຫາຍ, ຂັ້ນເມືອງມີ 238 ສະຫາຍ, ຍິງ 22 ສະຫາຍ, ພະສົງ 2 ອົງ; ຄະນະກໍາມະການແນວຂັ້ນບ້ານມີ 3,169 ສະຫາຍ, ຍິງ 348 ສະຫາຍ.

ໃນ​ກອງ​ປະ​ຊຸມ​ຄັ້ງ​ນີ້, ຜູ້​ເຂົ້າ​ຮ່ວມ​ຍັງ​ພ້ອ​ມ​ກັນ​ຄົ້ນ​ຄ້​ວາ ແລະ ປະ​ກອບ​ຄຳ​ຄິດ​ຄຳ​ເຫັນ​ໃສ່​ບົດ​ສະ​ຫຼຸບ ແລະ ທິດ​ທາງ​ແກ້​ໄຂ​ໃນ​ການ​ຈັດ​ຕັ້ງ​ປະ​ຕິ​ບັດ​​ວຽກ​ງານກໍ່​ສ້າງ​ຮາກ​ຖານ​ການ​ເມືອງແຕ່​ປີ 2021 - 2025, ທັງ​ນີ້ກໍ່​ເພື່ອເປັນ​ບ່ອນ​ອີງໃນ​ການ​ຈັດ​ຕັ້ງ​ປະ​ຕິ​ບັດໂດຍ​ສະ​ເພາະ​ແມ່ນ​ແໜ້ນ​ໃສ່​ວຽກ​ງານ 4 ເນື້ອ​ໃນ, 4 ຄາດ​ໝາຍ​ຢ່າງ​ກົງ​ໄປ​ກົງ​ມາ​ດ້ວຍ​ຄວາມ​ຮັບ​ຜິດ​ຊອບ​ສູງ ແລະ ເປັນ​ເອ​ກະ​ພາບ​ກັນ.

ໃນ​ຕອນ​ທ້າຍ​ຂອງກອງ​ປະ​ຊຸມ ທ່ານ ທ່ານ ຄຳຜອຍ ວັນນະສານ ເຈົ້າແຂວງໆຜົ້ງສາລີກໍ່ໄດ້ມີ​ຄຳ​ເຫັນ​ໂອ້​ລົມ ເຊີ່ງ​ກ່ອນ​ອື່ນ​ທ່າ​ນກໍ່​ໄດ້​ກ່າວ​ສະ​ແດງ​ຄວາມ​ຍ້ອງ​ຍໍ​ຊົມ​ເຊີຍ​ຕໍ່​ຄະ​ນະ​ຮັບ​ຜິດ​ຊອບ​ວຽກ​ງານກໍ່​ສ້າງ​ຮາກ​ການ​ເມືອງ ແລະ ທີມ​ງານ​ລົງ​ກໍ່​ສ້າງ​ຮາກ​ຖານ​ການ​ເມືອງ​ຕິດ​ພັນ​ກັບ​ວຽກ​ງານ 3 ສ້າງຂອງ​ແຕ່​ລະ​ພະ​ແນກ​ການ, ພ້ອມ​ກັນ​ນີ້​ທ່ານ​ຍັງ​ໄດ້​ຮຽກ​ຮ້ອງ​ ແລະ ໃຫ້​ເອົາ​ໃຈ​ໃສ່​ໃນ​ການຈັດ​ຕັ້ງ​ປະ​ຕິ​ບັດ ແລະ ແກ້​ໄຂ​ບັນ​ຫາ​ຕ່າງໆ​ດ້ວຍ​ສະ​ເພາະ​ແມ່ນ: ​ໃຫ້​ທຸກ​ພາກ​ສ່ວນສືບ​ຕໍ່​ແກ້​ໄຂ​ຄວາມ​ທຸກ​ຍາກ​ຂອງ​ພໍ່​ແມ່​ປະ​ຊາ​ຊົນ, ພ້ອມ​ກັນ​ແກ້​ໄຂ​ປະ​ກົດ​ການ​ຫຍໍ້​ທໍ້​ຕ່າງໆ​ພາຍ​ໃນ​ສັງ​ຄົມ​ໂດຍ​ສະ​ເພາະ​ແມ່ນ​ເລັ່ງ​ໃສ່​ບັນ​ຫາ​ຢາ​ເສບ​ຕິດ, ສືບ​ຕໍ່​ແກ້​ໄຂ​ຄວາມ​ອຶດ​ອັດ​ຊັກ​ຊ້າ​ທີ່​ເປັນ​ຕົວ​ທ່ວງ​ໃນ​ການ​ພັດ​ທະ​ນາ, ແກ້​ໄຂບັນ​ຫາ​ຄູ​ ແລະ ແພດ​ໝໍ​ທີ່​ເປັນ​ອາ​ສາ​ສະ​ມັກ, ໃຫ້​ທຸກ​ພາກ​ສ່ວນ​ຍົກ​ສູງວຽກ​ງານກໍ່​ສ້າງ​ຮາກ​ຖານ​ການ​ເມືອງ​ເປັນ​ວຽກ​ທີ່​ສຳ​ຄັນ ແລະ ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ຕ້ອ​ງສຸມ​ໃສ່​ທຸກ​ແຫລ່ງ​ທືນ​ທີ່​ມີ​ພາຍ​ໃນ​ແຂວງ, ສືບ​ຕໍ່​ກະ​ກຽມ​ການ​ດຳ​ເນີນກອງ​ປະ​ຊຸມ​ໃຫຍ່​ຂອງ​ບັນ​ດາ​ຄະ​ນະ​ພັກ​ຮາກ​ຖານ ແລະ ໝ່ວຍ​ພັກ​ຕ່າງໆ​ໃຫ້​ສຳ​ເລັດ​ໃນ​ເດືອນ​ມີ​ຖຸ​ນາ 2020.

ພາບ - ຂ່າວ: ແສງ​ຄຳ ສາ​ລີ​ວັນ