ວັນ

ປະກາດການແຕ່ງຕັ້ງ ຮອງເຈົ້າເມືອງໆ ເມືອງໃໝ່ ແຂວງຜົ້ງສາລີ

 

ໃນຕອນເຊົ້າຂອງວັນທີ່ 1 ມີຖຸນາ 2020 ນີ້, ຢູ່ທີ່ສະໂມສອນໃຫຍ່ຂອງເມືອງໃໝ່, ໄດ້ຈັດໃຫ້ມີພິທີປະກາດການແຕ່ງຕັ້ງຮອງເຈົ້າເມືອງໆໃໝ່, ແຂວງຜົ້ງສາລີຂື້ນຢ່າງເປັນທາງການ. ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ, ຜູ້ຊີ້ນຳຂົງເຂດວັດທະນະທຳສັງຄົມຂັ້ນແຂວງ, ທັງເປັນຜູ້ຊີ້ນຳວຽກງານຮອບດ້ານຂອງເມືອງໃໝ່, ມີທ່ານ ສົມຈີດ ສິດທິວົງ ກຳມະການພັກແຂວງ, ເລຂາພັກເມືອງເຈົ້າເມືອງໆໃໝ່, ມີບັນດາທ່ານຜູ້ຕ່າງໜ້າຈາກພະແນກພາຍໃນແຂວງ, ກວດກາແຂວງ, ຈັດຕັ້ງແຂວງ, ບັນດາທ່ານ ກຳມະການປະຈຳພັກເມືອງ, ກຳມະການພັກເມືອງ, ຫົວໜ້າ - ຮອງຫົວໜ້າຫ້ອງການ ພ້ອມດ້ວຍພາກສ່ວນທີກ່ຽວຂ້ອງເຂົ້າຮ່ວມ.

ໃນພິທີ ທ່ານ ສົມຈີດ ສິດທິວົງ ເຈົ້າເມືອງໆໃໝ່, ກໍ່ໄດ້ຂື້ນລາຍງານສະພາບການຈັດຕັ້ງປະຕິບັດວຽກງານຮອບດ້ານຂອງເມືອງໃໝ່ໂດຍຫຍໍ້ໃນໄລຍະທີ່ຜ່ານມາ. ຈາກນັ້ນ ທ່ານ ບຸນສະຫວັດ ເຫຼັກກັນຍາ ຫົວໜ້າຫ້ອງການບໍລິຫານຄະນະຈັດຕັ້ງແຂວງ ໄດ້ຂື້ນຜ່ານຂໍ້ຕົກລົງຂອງທ່ານ ເຈົ້າແຂວງ, ສະບັບເລກທີ 0969/ຈຂ.ຜລ ລົງວັນທີ່ 27 ເມສາ 2020 ວ່າດ້ວຍການແຕ່ງຕັ້ງ ໃຫ້ພະນັກງານດຳລົງຕຳແໜ່ງບໍລິຫານ ຂັ້ນຮອງເຈົ້າເມືອງໆໃໝ່ ເຊີ່ງໄດ້ຕົກລົງແຕ່ງຕັ້ງທ່ານ ຄຳເລີດ ອິນແກ້ວ ກຳມະການປະຈຳພັກເມືອງ, ເປັນຮອງເຈົ້າເມືອງ, ທ່ານ ດຣ ພອນສະຫວັນ ມະນີວົງສີ ກຳມະການພັກເມືອງ ເປັນຮອງເຈົ້າເມືອງ. ໃນໂອກາດນີ້ ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ, ຜູ້ຊີ້ນຳຂົງເຂດວັດທະນະທຳສັງຄົມຂັ້ນແຂວງ, ທັງເປັນຜູ້ຊີ້ນຳວຽກງານຮອບດ້ານຂອງເມືອງໃໝ່ ກໍ່ໄດ້ມີຄຳເຫັນໂອ້ລົມຕໍ່ພິທີເຊີ່ງກ່ອນອື່ນທ່ານກໍ່ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ໍ່ຜົນງານ ແລະ ໄຊຊະນະທີ່ທາງເມືອງໃໝ່ຍາດມາໄດ້ໃນໄລຍະທີ່ຜ່ານມາ ພ້ອມກັນນີ້ທ່ານຍັງໄດ້ຮຽກຮ້ອງມາຍັງຜູ້ທີ່ໄດ້ຮັບການແຕ່ງຕັ້ງໃໝ່ຈົ່ງເພີ່ມທະວີການກໍາແໜ້ນແນວທາງ, ນະໂຍບາຍ ຂອງພັກ-ລັດ, ມະຕິ, ຄໍາສັ່ງ, ນິຕິກຳຕ່າງໆຂອງຂັ້ນເທິງ ລວມທັງພາລະບົດບາດສິດໜ້າທີ່ຂອງແຕ່ລະພາກສ່ວນ, ຄາດໝາຍສູ້ຊົນທີ່ຂັ້ນເທິງກໍ່ຄືຂັ້ນຂອງຕົນວາງອອກ, ສືບຕໍ່ເສີມຂະຫຍາຍມູນເຊື້ອອັນດີໃນການຊີ້ນຳ-ນໍາພາວຽກງານຮອບດ້ານຕາມບົດບາດ ຂອງຄະນະປະຈໍາພັກເມືອງ ກໍ່ຄືຂອງການຄຸ້ມຄອງລັດ, ຄຸ້ມຄອງສັງຄົມ ຂອງອົງການປົກ ຄອງເມືອງ ເພື່ອໃຫ້ວຽກງານຮອບດ້ານ ກໍ່ຄືຄາດໝາຍຕ່າງໆ ທີ່ທາງເມືອງວາງອອກໃຫ້ບັນລຸເປັນກ້າວໆ.

( ພາບ - ຂ່າວ: ແສງຄຳ ສາລີວັນ )