ວັນ

ທ່ານ ຮອງເຈົ້າແຂວງໆຜົ້ງສາລີ ພ້ອມດ້ວຍຄະນະສະເພາະກິດ ຂັ້ນແຂວງ ລົງຕິດຕາມຊຸກຍູ້ ວຽກງານການປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ COVID-19 ຢູ່ເມືອງສຳພັນ.

 

ເພື່ອເປັນການຕິດຕາມເຝົ້າລະວັງການແຜ່ລະບາດຂອງພະຍາດອັກເສບປອດຂອງເຊື້ອຈຸລາໂລກສາຍພັນໃໝ່ຫຼື ໂຄວິດ 19 ແລະ ການ​ເຝົ້າ​ລະ​ວັງ​ພະ​ຍາດ​ຕາມ​ລະ​ດູ​ການນັ້ນ, ຕອນ​ເຊົ້າ​ຂອງວັນ​ທີ່ 2 ມີ​ຖຸ​ນາ 2020 ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ ທັງເປັນຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19, ພ້ອມດ້ວຍຄະນະສະເພາະກີດຂັ້ນແຂວງ ໄດ້ລົງເຄື່ອນໄຫວວຽກງານຕິດຕາມຊຸກຍູ້ ການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ແລະ ການ​ເຝົ້າ​ລະ​ວັງ​ພະ​ຍາດ​ຕາມ​ລະ​ດູ​ການຢູ່ເມືອງ​ສຳ​ພັນ, ການ​ລົງ​ເຮັດ​ໃນ​ຄັ້ງ​ນີ້ກໍ່​ໄດ້​ຮັ​ບ​ຟັງ​ການ​ລາຍ​ງານ​ສະ​ພາບການຈັດຕັ້ງປະຕິບັດວຽກງານກ່ຽວການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ຈາກ​ຄະ​ນະ​ສະ​ເພາະ​ກິດ​ຂັ້ນ​ເມືອງ. ເຊີ່ງ​ນັບ​ຕັ້ງ​ແຕ່​ໄດ້​ມີ​ການ​ລະ​ບາດ​ພະ​ຍາດໂຄວິດ 19 ເມືອງ​ສຳ​ພັນ​ໄດ້​ເອົາ​ໃຈ​ໃສ່​ໃນ​ການ​ປ້ອງ​ກັນ​ໂດຍ​ການ​ຫັນ​ເອົາຄຳ​ສັ່ງ​ແຈ້ງການ, ​ຄຳ​ແນະ​ ນ​ຳ​ຕ່າງໆ​ຂອງ​ຂັ້ນ​ສູນ​ກາງ ແລະ ຂັ້ນ​ແຂວງ, ໂດຍ​ການ​ແຕ່ງ​ຕັ້ງ​ຄະ​ນະ​ສະ​ເພາະ​ຂັ້ນ​ເມືອງ​ລົງເຄື່ອນໄຫວໂຄສະນາ ແລະ ແນະນໍາໃຫ້ບັນດາກຸ່ມບ້ານ, ບ້ານໃນທົ່ວເມືອງ ໄດ້ແນະນໍາໃຫ້ນາຍບ້ານແຕ່ລະບ້ານອອກມາດຕະການ ແລະ ແຕ່ງຕັ້ງຄະນະສະເພາະກິດຂັ້ນບ້ານ ພາຍໃນບ້ານຂອງຕົນໂດຍສົມທົບກັບຄະນະສະເພາະກິດຂັ້ນເມືອງໃນການຕິດຕາມຄົນເຂົ້າ-ອອກ ທີ່ມາຈາກຕ່າງເມືອງ, ຕ່າງແຂວງ ແລະ ຕ່າງປະເທດຢ່າງເຂັ້ມງວດ, ພ້ອມ​ທັງຕັ້ງຈຸດກວດກາຄົນເຂົ້າ-ອອກເມືອງຈໍານວນ 4 ຈຸດຄື: ຈຸດບ້ານຫາດງາໃຕ້, ຈຸດບ້ານອາເຊີ, ຈຸດບ້ານມູຈີ່ກາງ ແລະ ຈຸດບ້ານນໍ້າຮາງ ແລະ ແຕ່ງຕັ້ງຄະນະເຄື່ອນທີ່ເພື່ອເຄື່ອນໄຫວຕິດຕາມໂດຍ ນໍາໃຊ້ລົດຈັກມ້າຂາວ ເປີດວໍ ແຈ້ງເຕືອນພໍ່ແມ່ປະຊາຊົນ 2-3 ຄັ້ງ/ມື້, ໄດ້ກໍານົດຈຸດທີ່ແຍກປ່ຽວໃຫ້ບຸກຄົນທີ່ມາຈາກຕ່າງແຂວງ ແລະ ຕ່າງປະເທດ ພາຍໃນເມືອງປະກອບມີ ໂຮງໝໍ; ໂຮງຮຽນ; ຫ້ອງການບ້ານ ແລະ ກໍລະນີບ້ານທີ່ບໍ່ມີສະຖານທີ່ກັກບໍລິເວນຢູ່ພາຍໃນບ້ານ; ແມ່ນກໍານົດໃຫ້ໄປແຍກປ່ຽວຢູ່ຕາມສະນໍາຢູ່ໄຮ່ນາຮົ້ວສວນ. ຜ່ານການຈັດຕັ້ງປະຕິບັດຕິດຕາມກວດກາຕະຫຼອດໄລຍະຜ່ານມາເຫັນວ່າ: ມີຄົນເຂົ້າ-ອອກເມືອງ ມີທັງໝົດ 571 ຄົນ, ຍິງ  252  ຄົນ, ສະເພາະຄົນຕ່າງປະເທດທີ່ເຂົ້າມາເມືອງ ມີ 0 ຄົນ; ສ່ວນຫຼາຍແມ່ນພົນລະເມືອງຂອງເມືອງສໍາພັນທີ່ໄປຮັບຈ້າງ ແລະ ການໄປສຶກສາຮໍ່າຮຽນກັບມາຈາກຕ່າງປະເທດ ມີ 32 ຄົນ, ຍິງ 26 ຄົນ; ເຫຼືອນັ້ນແມ່ນເດີນທາງກັບມາຈາກຕ່າງເມືອງ, ຕ່າງແຂວງ ພາຍໃນປະເທດ, ມາຮອດປະຈຸບັນມີຄົນເດີນທາງກັບຈາກ ຕ່າງເມືອງ ຕ່າງແຂວງ ແລະ ຕ່າງປະເທດ ລວມທັງໝົດ 571 ຄົນ; ຍິງ 252 ຄົນ; ຄົບກໍານົດບໍລິເວນແຍກປ່ຽວ 14 ວັນແລ້ວ ມີ 571 ຄົນ, ຍິງ 252 ຄົນ. ການເຝົ້າລະວັງ, ການປ້ອງກັນພະຍາດຕາມລະດູການແມ່ນໄດ້ເອົາໃຈໃສ່ລົງສັກຢາກັນພະຍາດຢູ່ແຕ່ລະຈຸດ, ແຕ່ລະບ້ານໃນຂອບເຂດທົ່ວເມືອງຢ່າງເປັນປົກກະຕິໃນແຕ່ລະໄລຍະ, ອອກແຈ້ງການໃຫ້ແຕ່ລະບ້ານໃນ 63 ບ້ານໃນທົ່ວເມືອງກ່ຽວກັບການປ້ອງກັນພະຍາດຕາມລະດູການ. ຈາກນັ້ນ​ຜູ້​ເຂົ້າ​ຮ່ວ​ມ​ກໍ່​ໄດ້​ພ້ອມ​ກັນ​ປະ​ກອບ​ຄຳ​ຄິດ​ຄຳ​ເຫັນ​ໃສ່​ໃນ​ການ​ຈັດ​ຕັ້ງ​ປະ​ຕິ​ບັດ​ໃນ​ໄລ​ຍ​ະ​ທີ່​ຜ່ານ​ມາ ແລະ ຕໍ່​ໜ້າ, ໂດຍ​ສະ​ເພາະ​ແມ່ນ​ບັນ​ດາ​ມາດ​ຕະ​ການ​​ທີ່ທາງ​ຄະ​ນະ​ສະ​ເພາະ​ກິດ​ຂັ້ນ​ສູນ​ກາງ​​ໄດ້ຜ່ອນ​ຜັນ​ຫຼາຍ​ອັນ​ທາງນີ້ກໍ່​ເພື່ອ​ເປັນ​ບ່ອນ​ອີ່ງ ແລະ ເອ​ກະ​ພາບ​ການ​ໃນ​ການ​ຈັດ​ຕັ້ງ​ປະ​ຕິ​ບັດ​ໃນ​ຕໍ່​ໜ້າ.

  

ໃນ​ໂອ​ກາດນີ້ ​ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ ທັງເປັນຫົວໜ້າຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ກໍ່​ໄດ້​ຮຽກ​ໃຫ້​ທຸກ​ພາກ​ສ່ວນ​ພາຍ​ໃນ​ຄະ​ນະ​ສະ​ເພາະ​ກິດຂັ້ນ​ເມືອງ, ພາກ​ສ່ວນ​ກ່ຽວ​ຂ້ອງຈົ່ງ​ພ້ອມ​ກັນ​ເປັນ​ເຈົ້າ​ການ​ໃນ​ການ​ຈັດ​ຕັ້ງ​ປະ​ຕິ​ບັນດບັນດາ​ແຈ້ງ​ການ, ຄຳ​ສັ່ງ ຕ່າງໆ​ຂອງ​ຂັ້ນ​ສູນ​ກາງ ແລະ ແຂວງວາງ​ອອກ, ເອົາ​ໃຈ​ໃສ່​ຕິດ​ຕາມກວດ​ກາ​ຈຳ​ນວນແຮງ​ງານ​ທີ່​ມາ​ຈາກ​ບ່ອນ​ອື່ນ, ​ສືບ​ຕໍ່​ຕິດ​ຕາມ​ການ​ເປີດ​ການ​ຮຽນ - ການ​ສອນ ໂດຍ​ການ​ຮັກ​ສາ​ໄລ​ຍະ​ທ່າງ 1 ເມັດ, ນອກ​ຈາກນີ້ເອົາໃຈໃສ່ລົງສັກຢາກັນພະຍາດຢູ່ແຕ່ລະຈຸດ, ແຕ່ລະບ້ານໃນຂອບເຂດທົ່ວເມືອງຢ່າງເປັນປົກກະຕິໃນແຕ່ລະໄລຍະ.

ໃຫ້ພະນັກງານສຸກສາລາແຕ່ລະແຫ່ງເອົາໃຈໃສ່ໂຄສະນາໃຫ້ພໍ່ແມ່ປະຊາຊົນໃນຂອບເຂດສຸກສາລາຮັບຜິດຊອບແຕ່ລະບ້ານ ເພື່ອປ້ອງກັນພະຍາດຕາມລະດູການ, ແຕ່ງຕັ້ງພະນັກງານຮັບຜິດຊອບການເຝົ້າລະວັງ, ປ້ອງກັນການແຜ່ລະບາດຂອງພະ ຍາດຕາມລະດູການເປັນຕົ້ນພະຍາດໄຂ້ຍຸ້ງລາຍ, ພະຍາດຖອກທອງ ແລະ ພະຍາດອື່ນໆ. ພ້ອມ​ທັງກະກຽມຢາ ແລະ ອຸປະກອນການແພດ ເພື່ອຮັບໃຊ້ໃນການປິ່ນປົວພະຍາດ, ຖ້າຫາກມີການລະບາດເກີດຂຶ້ນ.

( ພາບ - ຂ່າວ: ແສງ​ຄຳ ສາ​ລີ​ວັນ )