60 ປີ ການເຕົ້າໂຮມ ສອງແຂວງ ແລະ ບັ້ນຮົບປົດປ່ອຍ ຜົ້ງສາລີ

ກະຊວງ​ ປ້ອງ​ກັນ​ປະເທດ ຈັດສຳ​ມະ​ນາ​ວິທະຍາສາດ ການ​ຂຶ້ນເຕົ້າໂຮມ​ ສອງ​ແຂວງ​ ຊຳ​ເໜືອ - ຜົ້ງ​ສາລີ ແລະ ປົດ​ປ່ອຍ​ຜົ້ງ​ສາລີ ຄົບຮອບ 60 ປີ ຂຶ້ນ​ວັນ​ທີ 14 ພະຈິກ 2014 ຢູ່​ທີ່​ສູນ​ການ​ຮ່ວມ​ມື ສາກົນ​ລາວ-ຍີ່ປຸ່ນ (ຫຼັກ 5) ນະຄອນ​ຫຼວງ​ວຽງ​ຈັນ ໃຫ້​ກຽດ​ເຂົ້າຮ່ວມ​ງານ​ຄັ້ງ​ນີ້ ມີ​ສະຫາຍ ບຸນຍັງ ວໍລະ​ຈິດ ກຳມະ ການ​ກົມການເມືອງ ​ສູນ​ກາງ​ພັກ ຜູ້​ປະຈຳການ​ຄະນະ​ເລຂາທິການ ​ສູນ​ກາງພັກ ຮອງ​ປະທານ​ປະເທດ ພ້ອມ ດ້ວຍ​ບັນດາ​ກຳມະການ​ ກົມ​ການເມືອງ ​ສູນ​ກາງ​ພັກ ຮອງ​ນາຍົກລັດຖະມົນຕີ ລັດຖະມົນຕີ​ວ່າການ ເຈົ້າ​ຄອງ​ ນະຄອນຫຼວງ ສະຫາຍວິລະ​ຊົນ​ ຜູ້​ເສຍສະຫຼະ ແລະ ພະນັກ​ງານ​ປະຕິວັດ​ ອາວຸໂສ. ສະຫາຍ ພົນ​ໂທ ຈັນ​ສະໝອນ ຈັນ​ຍາ​ລາດ ກຳມະການ​ສູນ​ກາງພັກ ລັດຖະມົນຕີ​ ຊ່ວຍ​ວ່າການ ກະຊວງ ​ປ້ອງ​ກັນ​ປະເທດ ​ກ່າວ​ວ່າ: 60 ປີ (21/11/1954-21/11/2014) ໃນ​ການ​ນຳພາ​ກຳລັງ ຂອງ​ແນວ​ລາວ​ອິດ ສະຫຼະ ແລະ ລັດຖະບານ​ລາວ​ຕໍ່ຕ້ານ ​ຂຶ້ນ​ສູ່​ເຂດເຕົ້າໂຮມ ​ສອງ​ແຂວງ ​ຊຳ​ເໜືອ-ຜົ້ງ​ສາລີ ແລະ ບັ້ນຮົບ ​ປົດ​ປ່ອຍ ຜົ້ງ​ສາລີ ແມ່ນ​ໄລຍະ​ທາງ​ປະຫວັດ​ສາດ​ ການ​ຕໍ່ສູ້​ປົດ​ປ່ອຍ​ຊາດ ​ຂອງ​ປະຊາຊົນ​ລາວ ບັນດາເຜົ່າ ເວົ້າ​ລວມ ປະຊາຊົນ​ແຂວງ​ ຜົ້ງ​ສາລີ - ຫົວພັນ ເວົ້າ​ສະເພາະ ເຊິ່ງການ​ຂຶ້ນ​ເຕົ້າໂຮມ​ສອງແຂວງ​ ຊຳເໜືອ-ຜົ້ງ​ສາລີ ແລະ ບັ້ນ​ປົດປ່ອຍ ​ຜົ້ງ​ສາລີ ແມ່ນ​ຜົນງານ​ ໄຊ​ຊະນະ​ອັນ​ໃຫຍ່​ຫຼວງ ​ຂອງ​ຂະ​ບວນການ ​ຕໍ່ສູ້​ປະຕິວັດ ແລະ ປະຊາຊົນ ລາວ ສຳ​ມະ​ນາ​ວິທະຍາສາດ ​ຄັ້ງນີ້ ຜູ້​ເຂົ້າ​ຮ່ວມ​ໄດ້​ຮັບ​ຟັງ ການ​ສະເໜີ​ບົດ​ວິທະຍາສາດ ແລະ ຮັບຟັງ​ ການ​ເລົ່າຄືນ​ເຫດການ​ຂອງພະນັກງານ​ປະຕິວັດ​ ອາວຸໂສ ​ທີ່​ໄດ້ເຂົ້າ​ຮ່ວມ​ເຫດການ ​ເຕົ້າໂຮມສອງ​ແຂວງ​ ທີ່​ທຸກ​ຍາກ​ລຳບາກ ຜ່ານ​ຜ່າ​ອຸປະສັກ​ນາໆ​ປະການ ບັນດາ​ບົດຮຽນ ແລະ ພຶດຕິ​ກຳຕົວ​ຈິງ ໃນ​ການ​ນຳພາ​ຕໍ່ສູ້​ ປະຕິບັດ​ສັນຍາ​ເຊີ​ແນວ​ ກ່ຽວ​ກັບ ​ລາວ ປີ 1954-1959 ຄວາມ​ໝາຍປະຫວັດສາດ ຕໍ່​ການ​ເລືອກ​ເອົາແຂວງ​ ຫົວພັນ ແລະ ແຂວງ​ ຜົ້ງສາລີ ເປັນ​ເຂດ​ທີ່​ໝັ້ນ​ ຂອງ​ການປະຕິວັດ ຄວາມ​ສຳຄັນ​ ຂອງ​ບັ້ນຮົບ​ປົດ​ປ່ອຍ ​ຜົ້ງ​ສາລີ ຕໍ່​ການ​ເຕົ້າໂຮມສອງ​ແຂວງ​ ຊຳ​ເໜືອ-ຜົ້ງ​ສາລີ ວຽກ​ງານ​ການ​ຕໍ່ສູ້ ​ປົກ​ປັກ​ຮັກສາ​ສອງ​ແຂວງ​ເຕົ້າໂຮມ ການ​ສືບຕໍ່ ​ກໍ່ສ້າງ​ຮາກ ຖານ​ການເມືອງ ເລັ່ງ​ໃສ່​ການ​ກໍ່ສ້າງ​ ກຳລັງ​ປະກອບ​ສ່ວນ​ປົກ​ປັກ​ຮັກສາ ສອງແຂວງ​ເຕົ້າໂຮມ ແລະ ການ​ປະລາ​ໄຊ​ ກົນອຸບາຍ​ຍົວະ​ເສືອ​ອອກຈາກ​ຖ້ຳ​ ຂອງ​ພວກ​ຈັກກະພັດ ຜູ້​ຮຸກ​ຮານ ແລະ ລັດຖະບານ​ຫຸ່ນວຽງ​ຈັນ​ ເປັນຕົ້ນ. ສຳລັບ​ແຂວງ​ ຊຳ​ເໜືອ ໄດ້​ຮັບການ​ປ່ຽນ​ຊື່​ມາ​ເປັນ​ ແຂວງ​ ຫົວພັນ ແຕ່​ປີ 1960 ເປັນຕົ້ນ​ມາ.