ສະຫາຍ ສົມສະຫວາດ ເລັ່ງສະຫວັດ ຮ່ວມບັ້ນດຳເນີນຊີວິດ ການເມືອງ ຢູ່ແຂວງ ຜົ້ງສາລີ

ໃນຕອນເຊົ້າ ຂອງວັນທີ 20 ກໍລະກົດ 2015 ທີ່ຫ້ອງວ່າການປົກຄອງ ແຂວງຜົ້ງສາລີ ໄດ້ເປີດບັ້ນດຳເນີນຊີວິດການເມືອງ ຂຶ້ນ ໂດຍໃຫ້ກຽດເປັນປະທານຂອງ ສະຫາຍ ສົມສະຫວາດ ເລັ່ງສະຫວັດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ຜູ້ຊີ້ນຳວຽກງານ ເສດຖະກິດການຜະລິດ ແລະ ຈໍລະຈອນ ເຊິ່ງມີສະຫາຍ ຄຳເຈນ ວົງໂພສີ ກຳມະການສູນກາງພັກ, ເລຂາຄະນະພັກແຂວງ ເຈົ້າແຂວງໆຜົ້ງສາລີ ພ້ອມນີ້ ກໍ່ມີຜູ້ຕາງໜ້າ ຈາກຫ້ອງວ່າການສູນກາງພັກ, ບັນດາຄະນະປະຈຳພັກແຂວງ ແລະ ກຳມະການພັກແຂວງ ເຂົ້າຮ່ວມ.

ສະຫາຍ ຄຳເຈນ ວົງໂພສີ ໄດ້ກ່າວວ່າ: ການເປີດບັ້ນ ດຳເນີນຊີວິດການເມືອງເທື່ອນີ້ ແມ່ນເພື່ອຜ່ານ ແລະ ປະກອບຄຳຄິດຄຳເຫັນ ໃສ່ບົດສຳຫຼວດ ການນຳພາລວມ ຂອງຄະນະບໍລິຫານງານ ພັກແຂວງ ແລະ ວຽກງານສະເພາະ ແຕ່ລະດ້ານ ຕະຫຼອດໄລຍະສະໄໝທີ IX ຂອງອົງຄະນະພັກແຂວງ ອັນເຫັນໄດ້ບັນດາຜົນງານ ແຫ່ງການຊີ້ນຳ-ນຳພາ, ທັງຍົກໃຫ້ເຫັນຈຸດດີ, ຈຸດອ່ອນ-ຂໍ້ຄົງຄ້າງ ແລະ ບາງບົດຮຽນ ທີ່ຖອດຖອນໄດ້ ເຊິ່ງໃນໄລຍະ 5 ປີທີ່ຜ່ານມາ ຄະນະບໍລິຫານງານພັກແຂວງ ໄດ້ພ້ອມກັນຊີ້ນຳ-ນຳພາ ໃນການເພີ່ມຄວາມເອົາໃຈໃສ່ ສຸມທຶນຮອນເຂົ້າໃນການປັບປຸງ ກໍ່ສ້າງພື້ນຖານໂຄງລ່າງ ທາງດ້ານເສດຖະກິດ ໃຫ້ຫຼາຍຂຶ້ນ ເປັນຕົ້ນ ເສັ້ນທາງຄົມມະນາຄົມ, ເຄຫາຜັງເມືອງ, ໄຟຟ້າ, ຊົນລະປະທານ ແລະ ອື່ນໆ; ການກໍ່ສ້າງ ເທດສະບານແຂວງແຫ່ງໃໝ່ ກໍ່ໄດ້ດຳເນີນ ດ້ວຍຄວາມພະຍາຍາມ ແລະ ສຳເລັດກວ່າ 11 ສ່ວນຮ້ອຍ, ເອົາໃຈໃສ່ປັບປຸງແກ້ໄຂ ກົນໄກດຶງດູດການລົງທຶນ ແລະ ຄຸ້ມຄອງການລົງທຶນ ໃຫ້ປະຕິບັດຖືກຕ້ອງ ຕາມກົດໝາຍ ສອດຄ່ອງກັບສະພາບ ຈຸດພິເສດຂອງທ້ອງຖິ່ນ ດັ່ງນັ້ນ, ເສດຖະກິດຂອງແຂວງ ຈຶ່ງໄດ້ສືບຕໍ່ຂະຫຍາຍຕົວ ຢ່າງຕໍ່ເນື່ອງ ສະເລ່ຍ 8,18 ສ່ວນຮ້ອຍຕໍ່ປີ, ລວມຍອດຜະລິດຕະພັນພາຍໃນ ກໍ່ລື່ນຄາດໝາຍ ສະເລ່ຍ 798 ໂດລາສະຫະລັດຕໍ່ຄົນຕໍ່ປີ; ຂະບວນການຜະລິດ, ທຸລະກິດ ແລະ ການຈໍລະຈອນ ໄດ້ດຳເນີນຕາມ 4 ທາງອອກຂອງແຂວງ ຢ່າງຟົດຟື້ນຕໍ່ເນື່ອງ; ການຜະລິດ ດ້ານກະສິກຳ-ປ່າໄມ້ເປັນສິນຄ້າ ກໍ່ເກີດມີຄອບຄົວ ຕົວແບບຫຼາຍຂຶ້ນ ເດັ່ນກວ່າໝູ່ ແມ່ນຢາງພາລາ, ຊາ, ໝາກແໜ່ງ, ກາເຟ, ພືດລະດູແລ້ງ ແລະ ການລ້ຽງສັດໃຫຍ່. ໄດ້ມີການເຕົ້າໂຮມເອົາບ້ານນ້ອຍ ໃຫ້ກາຍເປັນບ້ານໃຫຍ່ ຕິດພັນ ກັບການຈັດສັນພູມລຳເນົາ ແລະ ອາຊີບຄົງທີ່ ໂດຍມີການປະສານສົມທົບ ຢ່າງກົມກຽວ ກັບການຈັດຕັ້ງປະຕິບັດ ບັນດາໂຄງການ ຂອງລັດຖະບານ ເຮັດໃຫ້ຊີວິດການເປັນຢູ່ ຂອງປະຊາຊົນ ບັນດາເຜົ່າ ໄດ້ຮັບການຍົກລະດັບ ດີຂຶ້ນເປັນກ້າວໆ ອັດຕາຄວາມທຸກຍາກ ນັບມື້ນັບຫຼຸດລົງ.