ທ່ານ ຮອງນາຍົກລັດຖະມົນຕີ ເຄື່ອນໄຫວຢ້ຽມຢາມ ແລະ ເຮັດວຽກ ຢູ່ແຂວງ ຜົ້ງສາລີ

ໃນລະຫວ່າງວັນທີ 24-25 ກຸມພາ 2015 ທ່ານ ອາຊາງ ລາວລີ, ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດການປົກຄອງ ພ້ອມດ້ວຍຄະນະ ໄດ້ໄປຢ້ຽມຢາມ ແລະ ເຮັດວຽກ ຢູ່ ແຂວງຜົ້ງສາລີ ໂດຍໃຫ້ກຽດຕ້ອນຮັບຈາກ ທ່ານ ຄຳເຈນ ວົງໂພສີ ເຈົ້າແຂວງໆຜົ້ງສາລີ ພ້ອມດ້ວຍບັນດາຄະນະນຳຂອງແຂວງ, ຄະນະນໍາຂອງເມືອງ, ບັນດາພະແນກການອ້ອມຂ້າງພາຍໃນແຂວງ ແລະ ປະຊາຊົນ ພາຍໃນແຂວງ ໃຫ້ການຕ້ອນຮັບຢ່າງອົບອຸ່ນ.

ການມາເຄື່ອນໄຫວຢ້ຽມຢາມ ແລະ ເຮັດວຽກຂອງຄະນະ ທ່ານຮອງນາຍົກລັດຖະມົນຕີ ຄັ້ງນີ້ ທ່ານເຈົ້າແຂວງຜົ້ງສາລີ ໄດ້ລາຍງານໃຫ້ຊາບ ກ່ຽວກັບການຈັດຕັ້ງປະຕິບັດແຜນພັດທະນາ ເສດຖະກິດ-ສັງຄົມ ຢູ່ພາຍໃນແຂວງ ໂດຍຫຍໍ້ເຖິງແມ່ນວ່າໃນໄລຍະຜ່ານມາ ຢູ່ພາຍໃນແຂວງ ໄດ້ປະສົບຄວາມຫຍຸ້ງຍາກຫຼາຍດ້ານ ແຕ່ຄະນະພັກ-ອົງການປົກຄອງແຂວງ ກໍໄດ້ສືບຕໍ່ສຸມຄວາມພະຍາຍາມ ຂອງຕົນເຂົ້າໃນການຄົ້ນຄວ້າ ກຳແໜ້ນຈຸດພິເສດທີ່ຕັ້ງ ແລະ ໝູນໃຊ້ທ່າແຮງບົ່ມຊ້ອນ. ຜ່ານການຈັດຕັ້ງປະຕິບັດ ໄດ້ເຮັດໃຫ້ເສດຖະກິດ ຂອງແຂວງຂະຫຍາຍຕົວຢ່າງຕໍ່ເນື່ອງ ສະເລ່ຍປະມານ 8% ຕໍ່ປີ. ສໍາລັບສົກປີ 2013-2014 ເພີ່ມຂຶ້ນ 8,02%ໃນນັ້ນ ກະສິກຳເພີ່ມຂຶ້ນ 5,83, ອຸດສາຫະກຳເພີ່ມຂຶ້ນ 9,05% ແລະ ການບໍລິການເພີ່ມຂຶ້ນ 10,39; ໂຄງປະກອບເສດຖະກິດ ໄດ້ຫັນປ່ຽນໄປຕາມທິດຫັນເປັນອຸດສາຫະກຳ ແລະ ທັນສະໄໝ ເທື່ອລະກ້າວ. ລວມຍອດຜະລິດຕະພັນພາຍໃນ (GDP) ບັນລຸ 1.191,86 ຕື້ກີບ, ສະເລ່ຍລາຍຮັບໃສ່ຫົວຄົນບັນລຸໄດ້ 847 ໂດລາ/ປີ, ວຽກງານປ້ອງກັນຊາດ-ປ້ອງກັນຄວາມສະຫງົບ ໄດ້ສືບຕໍ່ຫັນພະນັກງານ ລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ທັງຢູ່ເຂດຈຸດສຸມ ແລະ ເຂດທົ່ວໄປ ຕາມ 4 ເນື້ອໃນ 4 ຄາດໝາຍຢ່າງເປັນປົກກະຕິ, ເປັນຕົ້ນແມ່ນ ປຸກຂະບວນການບ້ານປອດຄະດີ, ການປະຕິບັດກົດລະບຽບບ້ານ, ການເຄື່ອນໄຫວປະຕິບັດຄຳຂັວນຕ່າງໆ ຂອງອົງການຈັດຕັ້ງມະຫາຊົນ, ທັງປັບປຸງ ກຳລັງປ້ອງກັນຊາດ-ປ້ອງກັນຄວາມສະຫງົບທຸກຂັ້ນ ໃຫ້ມີຄວາມໜັກແໜ້ນເຂັ້ມແຂງ ໃນທຸກດ້ານເພີ່ມທະວີການພົວພັນຮ່ວມມື, ແລກປ່ຽນບົດຮຽນກັບແຂວງເພື່ອນມິດ ກໍ່ຄື ແຂວງໃກ້ຄຽງພາຍໃນປະເທດ; ວຽກງານສຶກສາທິການ ແລະ ກິລາ ໄດ້ປັບປຸງຍົກລະດັບພື້ນຖານ ເພື່ອເຮັດໃຫ້ການປະຕິບັດຕົວເລກ ບັນລຸເປົ້າໝາຍ ສະຫັດສະຫວັດດ້ານການພັດທະນາ; ວຽກງານແຮງງານ ແລະ ສະຫວັດດີການສັງຄົມ ໄດ້ສຸມໃສ່ ການຄຸ້ມຄອງແຮງງານ,ການພັດທະນາສີມືແຮງງານ. ພ້ອມນັ້ນ ການພັດທະນາຊົນນະບົດ ແກ້ໄຂຄວາມທຸກຍາກ ແລະ ການຈັດຕັ້ງປະຕິບັດວຽກງານ 3 ສ້າງ ແມ່ນໄດ້ສືບຕໍ່ປະຕິບັດຕາມ ຄໍາສັ່ງເລກທີ 09/ກມສພ, ຄໍາສັ່ງແນະນໍາ ເລກທີ 03/ກມສພ ແລະ ສືບຕໍ່ຈັດຕັ້ງປະຕິບັດຕາມ 4 ເນື້ອໃນ 4 ຄາດໝາຍ ໄດ້ມີການກຳນົດບາດກ້າວ, ຂັ້ນຕອນ ແລະ ວິທີການຈັດຕັ້ງປະຕິບັດຢ່າງລະອຽດ ໂດຍໄດ້ສຸມທຶນຮອນ ແລະ ພະນັກງານລົງໄປຈັດຕັ້ງປະຕິບັດຕົວຈິງ ຢູ່ບັນດາເຂດຈຸດສຸມ ແລະ ເຂດທົ່ວໄປຢ່າງເປັນຂະບວນກວ້າງຂວາງ ແລະ ທົ່ວເຖິງ.

ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມເຊີຍ ຕໍ່ບັນດາຜົນສຳເລັດຂອງແຂວງ, ເມືອງ ກໍ່ຄື ບ້ານ ໃນໄລຍະຜ່ານມາ ທີ່ໄດ້ມີຄວາມພະຍາຍາມສູງ ໃນການຈັດຕັ້ງປະຕິບັດ ຕາມແນວທາງນະໂຍບາຍຂອງພັກ, ຂອງລັດ ເຊິ່ງເຮັດໃຫ້ມີຫຼາຍອັນ ໄດ້ຮັບການປ່ຽນແປງ ແລະ ມີການປັບປຸງດີຂຶ້ນ, ພື້ນຖານໂຄງລ່າງກໍ່ໄດ້ຮັບການພັດທະນາ, ນອກຈາກນັ້ນ ວຽກງານການເມືອງແນວຄິດ ກໍ່ໄດ້ມີການສຶກສາອົບຮົມ, ວຽກງານປ້ອງກັນຊາດ-ປ້ອງກັນຄວາມສະຫງົບ ເຮັດໃຫ້ທົ່ວແຂວງ ມີຄວາມສະຫງົບຢ່າງໜັກແໜ້ນ, ເຮັດໃຫ້ຮາກຖານ ມີລະບົບປ້ອງກັນຊາດ-ປ້ອງກັນຄວາມສະຫງົບ, ການພົວພັນຮ່ວມມືກັບຕ່າງປະເທດ ກໍ່ໄດ້ເປີດກວ້າງ; ວຽກງານເສດຖະກິດ ກໍ່ມີບາດກ້າວຂະຫຍາຍຕົວ ເຊິ່ງເຮັດໃຫ້ຊີວິດການເປັນຢູ່ ຂອງປະຊາຊົນ ນັບມື້ນັບດີຂຶ້ນ ເຮັດໃຫ້ບັນດາຄອບຄົວທຸກຍາກ ມີຈຳນວນຫຼຸດລົງເທື່ອລະກ້າວ, ປະຊາຊົນ ໄດ້ປະກອບສ່ວນເຂົ້າໃນການບັນລຸເປົ້າໝາຍ ສະຫັດສະຫວັດດ້ານການພັດທະນາຢ່າງຕັ້ງໜ້າ. ແຕ່ເຖິງຢ່າງໃດກໍ່ດີ ໃນໂອກາດທີ່ມາຢ້ຽມຢາມນີ້, ທ່ານຮອງນາຍົກລັດຖະມົນຕີ ໄດ້ສະເໜີໃຫ້ພາກສ່ວນທີ່ກ່ຽວຂ້ອງ ຢູ່ພາຍໃນແຂວງ ເອົາໃຈໃສ່ບາງບັນຫາຕື່ມດັ່ງນີ້: ວຽກງານສຶກສາອົບຮົມການເມືອງແນວຄິດ ຕ້ອງໄດ້ສຸມໃສ່ ສຶກສາອົບຮົມພະນັກງານ, ທະຫານ, ຕຳຫຼວດ, ເຈົ້າໜ້າທີ່ທຸກຂັ້ນ, ຕະຫຼອດຮອດພໍ່ແມ່ປະຊາຊົນ ໃຫ້ເຂົ້າໃຈເລິກເຊິ່ງເຖິງຖອງ, ມີຄວາມສະຫງົບອຸ່ນອ່ຽງ, ເຊື່ອໝັ້ນຕໍ່ການນໍາພາຂອງພັກ-ລັດ ກໍ່ຄື ການພັດທະນາປະເທດ ໃນໄລຍະໃໝ່, ເນື່ອງຈາກວ່າ ປະຈຸບັນຜູ້ບໍ່ຫວັງດີ ໄດ້ໃຊ້ທຸກເລ່ລ່ຽມ ແລະ ທຸກກົນອຸບາຍ ໃນການໃສ່ຮ້າຍປ້າຍສີ, ໂຈມຕີພັກ-ລັດ, ບັນດາຜູ້ນໍາທັງຢູ່ສູນກາງ ແລະ ທ້ອງຖິ່ນ, ດ້ານການພັດທະນາເສດຖະກິດ ສືບຕໍ່ຕັ້ງໜ້າເສີມຂະຫຍາຍ ເພື່ອຊອກໃຫ້ໄດ້ທ່າແຮງ ການຜະລິດກະສິກຳເປັນສິນຄ້າພັດທະນາສີມືແຮງງານ. ຄຽງຄູ່ກັນນັ້ນ ໃຫ້ເອົາໃຈໃສ່ ດໍາເນີນຊີວິດການເມືອງ ໃຫ້ເລິກເຊິ່ງເຖິງຖອງ ສາມາດຕີລາຄາຖອດຖອນໄດ້ ບົດຮຽນທັງດ້ານດີ, ດ້ານອ່ອນ ແລະ ຂໍ້ຄົງຄ້າງ ຊອກໃຫ້ໄດ້ສາຍເຫດ ທີ່ພາໃຫ້ເກີດມີຈຸດດີ, ຈຸດອ່ອນ ຂອງການນໍາພາຄະນະພັກຕົນ ໃນໄລຍະຜ່ານມາ; ເອົາໃຈໃສ່ ໃນການຈັດຕັ້ງຜັນຂະຫຍາຍ ມະຕິຜົນກອງປະຊຸມ ສະຫຼຸບຖອດຖອນທົດລອງວຽກງານ 3 ສ້າງ ໃຫ້ລົງເລິກ ແລະ ເຂົ້າສູ່ຊີວິດຕົວຈິງ ໃຫ້ໄວຂຶ້ນ ແລະ ບັນຫາສຸດທ້າຍ ຕ້ອງໄດ້ເອົາໃຈໃສ່ ຈັດຕັ້ງປະຕິບັດວຽກງານ 4 ບຸກທະລຸ ໃຫ້ປະກົດຜົນເປັນຈິງ ເວົ້າລວມ, ເວົ້າສະເພາະ ແມ່ນການບຸກທະລຸທາງດ້ານຈິນຕະນາການ.