ສຳມະນາ ວິທະຍາສາດ ການຂຶ້ນເຕົ້າໂຮມ ສອງແຂວງ ຊຳເໜືອ-ຜົ້ງສາລີ ຄົບຮອບ 60 ປີ

ເພື່ອເປັນການຫວນຄືນມູນເຊື້ອ ການຕໍ່ສູ້ກູ້ຊາດ ການປະຕິວັດ ຂອງກອງປະທັບປະຊາຊົນລາວ ໃນສອງແຂວງຊຳເໜືອ-ຜົ້ງສາລີ. ດັ່ງນັ້ນ ໃນວັນທີ 17 ພະຈິກ 2014 ໄດ້ມີການ ຈັດກອງປະ ຊຸມສຳມະ ນາວິທະຍາສາດ ການເຕົ້າໂຮມ ສອງແຂວງຊຳເໜືອ-ຜົ້ງສາລີ ຄົບຮອບ 60 ປີ (21/ 11/ 1954 - 21/ 11/ 2014) ຂຶ້ນ ຢູ່ສູນ ICTC (ຫຼັກ 5) ນະຄອນຫຼວງວຽງຈັນ. ພາຍໃຕ້ ການເປັນປະທານ ທ່ານ ອາຊາງ ລາວລີ ຮອງນາຍົກ ລັດຖະມົນຕີ, ຜູ້ຊີ້ນຳ ວຽກງານປົກຄອງ; ໂດຍໃຫ້ກຽດເຂົ້າຮ່ວມ ທ່ານ ບຸນຍັງ ວໍລະຈິດ ຮອງປະທານປະເທດ; ທ່ານ ດຣ. ບຸນປອນ ບຸດຕະນະວົງ, ຮອງນາຍົກລັດຖະມົນຕີ, ຜູ້ຊີ້ນຳວຽກງານຂົງເຂດ ເສດຖະກິດມະຫາພາກ ແລະ ບໍລິການ; ທ່ານ ພົ/ທ ຈັນສະໝອນ ຈັນຍາລາດ ລັດຖະມົນຕີຊ່ວຍວ່າການ ກະຊວງປ້ອງກັນປະເທດ, ເຈົ້າຄອງນະຄອນຫຼວງວຽງຈັນ, ບັນດາເຈົ້າແຂວງ ຕະຫຼອດຮອດນາຍທະຫານ, ຕຳຫຼວດ ແລະ ອົງການຈັດຕັ້ງ ຈາກພາກສ່ວນຕ່າງໆ ທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ການຈັດກອງປະຊຸມສຳມະນາ ຄັ້ງນີ້, ຈຸດປະສົງ ແມ່ນເພື່ອຄົ້ນ ເຫັນບັນດາບົດຮຽນ ແລະ ວິລະກຳ ອັນຍິ່ງໃຫຍ່ ໃນຍຸດທະສາດ ການນຳກຳລັງ ຂອງແນວລາວອິດສະຫຼະ ຂຶ້ນເຕົ້າໂຮມ ຢູ່ສອງແຂວງ ຊຳເໜືອ-ຜົ້ງສາລີ ແລະ ຍຸດທະສາດ ບັ້ນຮົບປົດປ່ອຍຜົ້ງສາລີ ຄົບຮອບ 60 ປີ. ຜ່ານການຈັດຕັ້ງ ສຳມະນາເປັນເວລາ 1 ວັນ, ບັນດາສະຫາຍຜູ້ແທນ ໄດ້ສຸມໃສ່ ສະເໜີບັນດາເນື້ອໃນ ຄວາມໝາຍສຳຄັນ ໃນການນຳກຳລັງ ຂຶ້ນສູ່ເຂດເຕົ້າໂຮມ ສອງແຂວງດັ່ງກ່າວ ແລະ ການປົດປ່ອຍຜົ້ງສາລີ ຢ່າງມີຊີວິດຊີວາ, ຖືກກັບສະພາບຄວາມເປັນຈິງ ຂອງຂະບວນການ ປະຕິວັດ ລາວ-ຫວຽດນາມ ໃນເວລານັ້ນ. ນອກນີ້, ກອງປະຊຸມ, ຍັງໄດ້ຮູ້ເຖິງວິລະກຳ ອັນລ້ຳເລີດ ແລະ ຫວນຄືນເບິ່ງ ບັນດາຮູບພາບ ແຫ່ງການຕໍ່ສູ້ທີ່ດຸເດືອດ, ການເສຍສະຫຼະ ຂອງບັນດານັກຮົບປະຕິວັດ, ສະມາຊິກພັກ, ກອງທັບ ແລະ ປະຊາຊົນສອງແຂວງ ຊຳເໜືອ-ຜົ້ງສາລີ ຄຽງຄູ່ກັນນັ້ນ, ກໍ່ເພື່ອສຶກສາອົບຮົມ ໃຫ້ຖັນແຖວຄົນລຸ້ນໃໝ່ ໄດ້ຮັບຮູ້ຕົ້ນກຳເນີດ ຂະບວນການປະຕິວັດ ຂອງປະຊາຊົນລາວບັນດາເຜົ່າ, ຮູ້ໄດ້ນ້ຳໃຈສາມັກຄີສູ້ຮົບພິເສດ ລະຫວ່າງສອງກອງທັບ ລາວ-ຫວຽດນາມ ແລະ ສືບຕໍ່ຮັດແໜ້ນເສີມຂະຫຍາຍມູນເຊື້ອ ທີ່ສະຫງ່າງາມ, ຄວາມສາມັກຄີພິເສດສອງຊາດ ເພື່ອພ້ອມກັນ ປະຕິບັດພັນທະໜ້າທີ່ ແຫ່ງການປົກປັກຮັກສາ ແລະ ສ້າງສາປະເທດຊາດ ກໍ່ຄືພັດທະນາສອງແຂວງດັ່ງກ່າວ ແລະ ຖານທີ່ໝັ້ນ ຂອງການປະຕິວັດ ໃຫ້ນັບວັນນັບຈະເລີນກ້າວໜ້າ ໄປຢ່າງບໍ່ຢຸດຢັ້ງ. ພ້ອມກັນນັ້ນ, ທີ່ກອງປະຊຸມ ຍັງໄດ້ຜ່ານສະເໜີ ບັນດາວິທະຍາສາດ ຂອງບັນດາສະຫາຍ ນັກສຳມະນາກອນ ລາວ-ຫວຽດນາມ. ພ້ອມດ້ວຍການຢັ້ງຢືນ ຈາກພະຍານປະຫວັດສາດ ລວມທັງການຮັບຟັງຄຳເຫັນ ຂອງບຸກຄົນສຳຄັນ ທີ່ໄດ້ເຂົ້າຮ່ວມສອງແຂວງ ແລະ ການສູ້ຮົບຕົວຈິງ, ກໍ່ສ້າງຮາກຖານທີ່ໝັ້ນການ ປະຕິວັດ, ໄດ້ຮັບຟັງການແລກປ່ຽນ, ການສຳມະນາ ຂອງພະນັກງານປະຕິວັດ ອາວຸໂສ ລາວ-ຫວຽດນາມ ກ່ຽວກັບການຮ່ວມມືສຳພັນ ສາມັກຄີສູ້ຮົບພິເສດ, ການຊ່ວຍເຫຼືອເຊິ່ງກັນ ແລະ ກັນ ຢູ່ໃນຊຸມປີ ແຫ່ງການຕໍ່ສູ້ກູ້ຊາດຮ່ວມກັນ ໃນຂຸມຄອງດຽວກັນ ເພື່ອຍາດເອົາໄຊຊະນະ, ເອກະລາດ ມາໃຫ້ສອງປະເທດເຮົາ.

ຈາກນັ້ນ, ທີ່ກອງປະຊຸມ ຍັງໄດ້ຮັບຟັງການໂອ້ລົມ ຈາກທ່ານ ບຸນຍັງ ວໍລະຈິດ ຮອງປະທານປະເທດ. ກ່ອນອື່ນໝົດ ທ່ານໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາສະຫາຍຄະນະຊີ້ນຳ, ພາກສ່ວນວິຊາ ການ, ນັກສຳມະນາກອນ ແລະ ຜູ້ແທນ ທີ່ມີຄວາມອົດທົນ ທີ່ເຮັດໃຫ້ການກະກຽມກອງປະຊຸມຄັ້ງນີ້ ໄດ້ດຳເນີນໄປດ້ວຍຜົນສຳເລັດ ອັນຈົບງາມ ແລະ ມີຄວາມໝາຍອັນຍິ່ງໃຫຍ່. ພ້ອມນີ້, ທ່ານ ຮອງປະທານປະເທດ ຍັງໄດ້ຮຽກຮ້ອງ ໃຫ້ບັນດານັກຄົ້ນຄ້ວາ ຈົ່ງພ້ອມກັນ ກຳແໜ້ນບາງບັນຫາ ເປັນຕົ້ນ ການນຳພາ ຂອງພັກຄອມມູນິດ ອິນດູຈີນ ແລະ ແນວລາວອິດສະຫຼະ ຕໍ່ການເຕົ້າໂຮມ ຂອງສອງແຂວງຫົວພັນ-ຜົ້ງສາລີ ແລະ ສະໜາມຮົບພາກເໜືອລາວ ເວົ້າລວມ ບັ້ນຮົບປົດປ່ອຍ ຊຳເໜືອ-ຜົ້ງສາລີ ໄດ້ກາຍເປັນສະຖານທີ່ທຳອິດ ທີ່ສະແດງໃຫ້ເຫັນ ເຖິງສາຍພົວພັນສາມັກຄີສູ້ຮົບ ລະຫວ່າງສອງຊາດ ລາວ-ຫວຽດນາມ ຢ່າງມີຊີວິດຊີວາ. ໄປພ້ອມກັບການກະກຽມດ້ວຍຄວາມເຄັ່ງຮ້ອນ, ຜ່ານຜ່າຄວາມຫຍຸ້ງຍາກລຳບາກ ເພື່ອໂຄ້ນລົ້ມແອກປົກຄອງ ຂອງຈັກກະພັດລ່າເມືອງຂຶ້ນແບບເກົ່າ, ສ້າງຕັ້ງອຳນາດການປົກຄອງປະຕິວັດຂຶ້ນ ຢູ່ສອງແຂວງຫົວພັນ-ຜົ້ງສາລີ; ການນຳພາຂອງແນວລາວອິດສະຫຼະ ແລະ ກອງທັບບັນຊາການ ຮ່ວມມືລາວ-ຫວຽດນາມ ໃນບັ້ນຮົບປົດປ່ອຍຜົ້ງສາລີ ແມ່ນສະແດງເຖິງ ການນຳພາອັນສະຫຼາດສ່ອງໃສ ຂອງພັກ ຄອມມູນິດອິນດູຈີນ ແລະ ແນວລາວອິດສະຫຼະ ສະແດງໃຫ້ເຫັນ ເຖິງຄວາມມີພິບໄຫວ; ໄຊຊະນະຍຸດທະສາດ ບັ້ນຮົບປົດປ່ອຍຜົ້ງສາລີ ໄດ້ກາຍເປັນບາດລ້ຽວປະຫວັດສາດ ໜຶ່ງໃນການຮັດແໜ້ນການພົວພັນ ສາມັກຄີສູ້ຮົບແບບພິເສດ ຂອງສອງຊາດ ລາວ-ຫວຽດນາມ ເພື່ອຕີເອົາໄຊຊະນະຂອງພວກສັດຕູ ຊຶ່ງແມ່ນກຸ່ມຈັກກະພັດຮັ່ງມີ ແລະ ເຂັ້ມແຂງ, ການພົວພັນສາມັກຄີພິເສດ ລາວ-ຫຽດນາມ ໄດ້ຮັບການສ້າງຕັ້ງ ຂຶ້ນບົນເສັ້ນທາງຕໍ່ສູ້ ທີ່ຍືດເຍື້ອຍາວນານ, ລຳບາກ, ເສຍສະຫຼະຜ່ານຜ່າທຸກຄວາມທ້າທາຍ ທົດສອບນາໆປະການ ແລະ ທຸລະກັນດານ ດ້ວຍບັນດາລ່ຽມລາຍ ເພື່ອຍາດເອົາໄຊຊະນະ ຈາກຈັກກະພັດ ຜູ້ທີ່ຮຸກຮານ ໄດ້ຢ່າງສະຫງ່າງາມ.