ໄຂກອງປະຊຸມໃຫຍ່ ຜູ້ແທນ ອົງຄະນະພັກ ແຂວງຜົ້ງສາລີ ຄັ້ງທີ X

ກອງປະຊຸມ ໃຫຍ່ຜູ້ແທນ ອົງຄະນະພັກ ແຂວງຜົ້ງສາລີ ຄັ້ງທີ X ໄດ້ໄຂຂຶ້ນຢ່າງ ເປັນທາງການ ແລະ ສະຫງ່າຜ່າເຜີຍ ໃນຕອນເຊົ້າ ຂອງວັນທີ 10 ສິງຫາ 2015 ທີ່ຫໍວັດທະນະທຳ ຂອງແຂວງ ພາຍໃຕ້ການ ເປັນປະທານ ຂອງສະຫາຍ ຄຳເຈນ ວົງໂພສີ ກໍາມະການ ສູນກາງພັກ, ເລຂາຄະນະ ບໍລິຫານງານ ພັກແຂວງ, ເຈົ້າແຂວງໆ ຜົ້ງສາລີ; ໂດຍໃຫ້ກຽດ ເຂົ້າຮ່ວມ ຂອງສະຫາຍ ສົມສະຫວາດ ເລັ່ງສະ ຫວັດ ກໍາມະການກົມ ການເມືອງສູນກາງພັກ, ຮອງນາຍົກ ລັດຖະມົນຕີ, ຜູ້ຊີ້ນຳວຽກງານ ເສດຖະກິດ ການຜະລິດ ແລະ ຈໍລະຈອນ; ມີຜູ້ຕາງໜ້າ ຈາກຄະນະຈັດຕັ້ງ ສູນກາງພັກ ແລະ ອົງການ ກວດກາ ສູນກາງພັກ; ບັນດາຜູ້ຕາງໜ້າ ຄະນະບໍລິຫານງານ ພັກແຂວງອ້ອມຂ້າງ; ບັນດາຄະນະ ປະຈຳພັກ-ຄະນະພັກ ແຂວງ ແລະ ຜູ້ແທນກອງປະຊຸມ 265 ສະຫາຍ, ຍິງ 38 ສະຫາຍ ທີ່ຕາງໜ້າ ໃຫ້ສະມາຊິກພັກ ໃນທົ່ວ ແຂວງຜົ້ງສາລີ 9 ພັນກວ່າສະຫາຍ ເຂົ້າຮ່ວມກອງ ປະຊຸມ ໃນເທື່ອນີ້.

ໜ້າທີ່ສໍາຄັນ ຂອງກອງປະຊຸມໃຫ່ຍຄັ້ງນີ້, ສະຫາຍປະທານ ກອງປະຊຸມໃຫຍ່ ໄດ້ກ່າວວ່າ: ກອງປະຊຸມ ຈະໄດ້ສຸມໃສ່ພິຈາລະນາ ແລະ ຮັບຮອງເອົາ ບົດລາຍງານການເມືອງ, ບົດສຳຫຼວດ ການນຳພາລວມ ຂອງຄະນະພັກ ບໍລິຫານງານພັກ ແຂວງຊຸດທີ IX, ວິໄສທັດໃນການ ພັດທະນາແຂວງຜົ້ງສາລີ ຮອດປີ 2030 ແລະ ແຜນພັດທະນາ ເສດຖະກິດ-ສັງຄົມ ແຕ່ປີ 2016-2020, ກອງປະຊຸມ ຈະໄດ້ຮັບຟັງ ການປະກອບ ຄໍາຄິດຄໍາເຫັນ ຈາກຜູ້ຕາງໜ້າ ຄະນະບໍລິຫານ ງານພັກແຂວງ ອ້ອມຂ້າງ, ບັນດາພະແນກການ, ອົງການທຽບເທົ່າ ອ້ອມຂ້າງແຂວງ, ບັນດາເມືອງ, ຕົວແບບດ້ານ ຕ່າງໆ, ພ້ອມກັນນີ້ ຈະໄດ້ດຳເນີນ ການເລືອກຕັ້ງ ເອົາຄະນະບໍລິຫານງານ ພັກແຂວງຊຸດທີ X ເພື່ອເປັນຫຼັກແຫຼ່ງ ໃນການນໍາພາການ ຈັດຕັ້ງປະຕິບັດ ແລະ ຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ X ໃຫ້ປະກົດຜົນເປັນຈິງ ແລະ ຈະໄດ້ເລືອກເອົາຜູ້ແທນ ຂອງອົງຄະນະພັກແຂວງ ໄປຮ່ວມກອງປະຊຸມໃຫຍ່ ຄັ້ງທີ X ຂອງພັກປະຊາຊົນ ປະຕິວັດລາວ. ພິເສດ ກອງປະຊຸມ ຍັງຈະໄດ້ຮັບຟັງ ການໂອ້ລົມ ແລະ ຊີ້ທິດເຍືອງ ທາງຈາກ ສະຫາຍ ສົມສະຫວາດ ເລັ່ງສະຫວັດ.

ໝາກຜົນ ຕະຫຼອດໄລຍະ 5 ປີ ຂອງການຈັດຕັ້ງປະຕິບັດ ມະຕິກອງປະຊຸມໃຫຍ່ ຜູ້ແທນອົງຄະນະພັກ ແຂວງຜົ້ງສາລີ ຄັ້ງທີ IX ໄດ້ສະແດງ ໃຫ້ເຫັນວ່າ: ທົ່ວແຂວງ ມີສະຖຽນລະພາບ ທາງດ້ານການເມືອງ, ທົ່ວສັງຄົມ ມີຄວາມສະຫງົບ ແລະ ມີຄວາມເປັນ ລະບຽບຮຽບຮ້ອຍ ໂດຍພື້ນຖານ, ປະຊາຊົນບັນດາເຜົ່າ ສືບຕໍ່ຮັກສາໄດ້ມູນເຊື້ອ ຄວາມສາມັກຄີ ເປັນປຶກແຜ່ນ, ເສດຖະກິດ-ສັງຄົມ ມີການພັດທະນາ-ຂະຫຍາຍຕົວ ຕໍ່ເນື່ອງ ແລະ ໝັ້ນທ່ຽງ ສະເລ່ຍ 8,18 ສ່ວນຮ້ອຍຕໍ່ປີ, ລາຍຮັບ ສະເລ່ຍໃສ່ຫົວຄົນ ເພີ່ມຂຶ້ນ ຈາກ 461 ໂດລາ ໃນປີ 2010 ມາເປັນ 798 ໂດລາ (ເພີ່ມຂຶ້ນ 73 ສ່ວນຮ້ອຍ ແລະ ລື່ນຄາດໝາຍ 5,8 ສ່ວນຮ້ອຍ); ຊີວິດການເປັນຢູ່ ຂອງປະຊາຊົນ ບັນດາເຜົ່າ ໄດ້ຮັບການປັບປຸງ, ຍົກລະດັບດີຂຶ້ນ ເປັນກ້າວໆ. ປະຈຸບັນທົ່ວແຂວງ ຍັງມີບ້ານທຸກຍາກ ກວມ 63 ກວ່າສ່ວນ ຮ້ອຍທຽບໃສ່ປີ 2011 ຫຼຸດລົງ 24 ສ່ວນຮ້ອຍ, ຄອບຄົວທຸກຍາກ ຍັງເຫຼືອ 27 ກວ່າສ່ວນຮ້ອຍ ທຽບໃສ່ປີ 2011 ຫຼຸດລົງ 42 ສ່ວນຮ້ອຍ, ບ້ານທີ່ມີເສັ້ນທາງ ເຂົ້າເຖິງ ກວມ 93 ສ່ວນຮ້ອຍ ທຽບໃສ່ປີ 2010 ເພີ່ມຂຶ້ນ 13 ສ່ວນຮ້ອຍ (ທຽວໄດ້ສອງລະດູ ກວມ 50 ສ່ວນຮ້ອຍ), ອັດຕາການນຳໃຊ້ນ້ຳລິນ-ນໍ້າສະອາດກວມ 78 ສ່ວນຮ້ອຍ, ອັດຕາການນຳໃຊ້ວິດຖ່າຍ ກວມ 44 ສ່ວນຮ້ອຍ, ອັດຕາການຊົມໃຊ້ ໄຟຟ້າ ກວມ 50 ສ່ວນຮ້ອຍ ຂອງຈຳນວນບ້ານ ແລະ ກວມ 48 ກວ່າສ່ວນຮ້ອຍ ຂອງຄອບຄົວທັງໝົດ ໃນທົ່ວແຂວງ (ປະຕິບັດໄດ້ ເກືອບ 81 ສ່ວນຮ້ອຍ ຂອງແຜນການ), ອັດຕາການ ປົກຫຸ້ມຂອງປ່າໄມ້ ເພີ່ມຂຶ້ນຈາກ 58 ສ່ວນຮ້ອຍ ໃນປີ 2010 ມາເປັນ 65 ສ່ວນຮ້ອຍ ໃນປີ 2015.

ໃນໂອກາດ ກ່າວເປີດກອງປະຊຸມ, ສະຫາຍ ຄຳເຈນ ວົງໂພສີ ໄດ້ຮຽກຮ້ອງ ຜູ້ແທນກອງປະຊຸມ ຈົ່ງເຊີດຊູຄວາມຮັບຜິດຊອບ ການເມືອງຂອງຕົນ ເຂົ້າໃນການຄົ້ນຄວ້າ ປະກອບຄຳຄິດຄຳເຫັນ ໃສ່ລາຍງານ ການເມືອງ, ທັງພິຈາລະນາ ຮັບຮອງເອົາ ແລະ ນຳເອົາໄປຈັດຕັ້ງ ຜັນຂະຫຍາຍ ເຂົ້າໃນວຽກງານຕົວຈິງ ໃຫ້ເຮັດໃຫ້ການດຳເນີນ ກອງປະຊຸມໃຫຍ່ຄັ້ງນີ້ ມີຜົນສຳເລັດ ຕາມລະດັບ ຄາດໝາຍ ທີ່ວາງ ໄວ້ ຢ່າງຈົບງາມ. ກອງປະຊຸມຄັ້ງນີ້ ຈະໄດ້ດຳເນີນໄປຈົນຮອດ ຕອນເຊົ້າຂອງວັນທີ12 ສິງຫາ 2015.