ປະຫວັດຄວາມເປັນມາ ຂອງແຂວງຜົ້ງສາລີ

ແຂວງຜົ້ງສາລີ ເປັນແຂວງທີ່ຕັ້ງຢູ່ພາກເໜືອສຸດ ຂອງ ສປປ ລາວ. ມີເນື້ອທີ່ທັງໝົດ 16,270 ກິໂລແມັດມົນທົນ, ມີພົນລະເມືອງທັງໝົດ 175,000 ຄົນ. ທາງທິດເໜືອ ແລະ ທິດຕາເວັນຕົກ ຂອງແຂວງຜົ້ງສາລີ ມີຊາຍແດນຕິດກັບ ສີບສອງພັນນາ ປະເທດຈີນ. ທິດຕາເວັນອອກ ຕິດກັບ ປະເທດຫວຽດນາມ, ທິດໃຕ້ຕິດກັບ ແຂວງ ຫຼວງພະບາງ ແລະ ທິດຕາເວັນຕົກສ່ຽງໃຕ້ ຕິດກັບ ແຂວງ ອຸດົມໄຊ.

ພູທີ່ສູງທີ່ສຸດ ໃນແຂວງຜົ້ງ​ສາລີ ແມ່ນພູດອຍຈີ, ມີຄວາມສູງ 1,842 ແມັດ (6,043 ຟຸດ). ເຂດອະນຸລັກ ພາຍໃນແຂວງຜົ້ງສາລີ ລວມມີ ເຂດອະນຸລັກຊີວະນາໆພັນ ພູແດນດິນ ແລະ ເຂດອະນຸລັກນໍ້າລານ. ວຽກງານກະສິກໍາ ແມ່ນເປັນອາຊີບຫຼັກ ຂອງປະຊາຊົນ ແຂວງ ຜົ້ງສາລີ. ແຂວງ ຜົ້ງສາລີ ເປັນທາງເຂົ້າ-ອອກ ທາງດ້ານການຄ້າທີ່ສໍາຄັນ ລະຫວ່າງ ສປປ ລາວ ແລະ ປະເທດຈີນ, ການສົ່ງອອກໄມ້, ການນໍາເຂົ້າສິນຄ້າ ສໍາເລັດຮູບຫຼາຍຊະນິດ.

ແຂວງ ຜົ້ງສາລີ ອຸດົມສົມບູນໄປດ້ວຍ ຊັບພະຍາກອນທໍາມະຊາດ ເຊັ່ນ: ມີ​ແມ່​ນໍ້າ​ສາຍ​ຕ່າງໆ, ​ເຊິ່ງສາມາດ​ເປັນ​ທ່າ​ແຮງ​ ແຫຼ່ງພະລັງງານ ສໍາລັບ ​ເຂື່​ອນ​ໄຟຟ້າ​ຂະ​ໜາດ​ນ້ອຍ. ນອກຈາກ​ນັ້ນ, ​ກໍ່​ຍັງ​ປົກ​ຄຸມ​ໄປ​ດ້ວຍ​ປ່າ​ໄມ້​ເປັນ​ສ່ວນ​ໃຫຍ່ ​ແລະ ມີ​ແຫຼ່ງຊັບພະຍາກອນ ​ແຮ່​ທາດ​ຢ່າງ​ຫຼວງ​ຫຼາຍ ເຊັ່ນ: ຖ່ານ​ຫີນ, ທອງ​ແດງ ​ແລະ ສັງກະສີ.

ປັດຈຸ​ບັນ ​ ເມືອງ ​ຜົ້ງ​ສາລີ​ ແມ່ນ​ເປັນເທດສະບານ​ແຂວງ ຊຶ່ງໃນຕໍ່ໜ້າໄດ້ມີ​ແຜນ​ຍົກຍ້າຍ​ເທດສະບານ​ແຂວງ​ມາ​ຢູ່​ເມືອງ​ ບຸນ​ເໜືອ. ສິ່ງ​ນີ້​ຈະ​ມີ​ຄວາມ​ສະດວກ​ໃນ​ການ​ເຂົ້າ​ເຖິງ​ເ ທດສະບານ​ແຂວງ, ​ເພາະວ່າ ​ເມືອງ ​ບຸນ​ເໜືອ ສາມາດ​ເຂົ້າ​ເຖິງ​ດ້ວຍ​ລົດ​ໄດ້​ສະດວກ​ກວ່າ ​ແລະ ສາມາດ​ປັບປຸງ​ສະພາບ​ເສດຖະກິດ​ ຂອງ​ແຂວງ ເຊັ່ນ: ການ​ຄ້າຂາຍ​ກັບ ປະ​ເທດ​ ສປ ຈີນ.