ເປີດກອງປະຊຸມ ວຽກງານພັດທະນາຊົນນະບົດ ແລະ ລຶບລ້າງຄວາມທຸກຍາກ ທົ່ວປະເທດ ປະຈໍາສົກປີ 2013-2014

ໃນວັນທີ 5 ພະຈິກ 2014 ຢູ່ທີ່ ສູນຝຶກອົບຮົມ ຫຼັກ 5 (ICTC) ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ໄດ້ຈັດກອງປະຊຸມ ​ພັດທະນາຊົນນະບົດ ແລະ ລຶບລ້າງຄວາມທຸກຍາກ ທົ່ວປະເທດ ປະຈໍາສົກປີ 2013-2014 ໂດຍພາຍໃຕ້ການເປັນປະທານຂອງ ທ່ານ ບຸນເຮືອງ ດວງພະຈັນ ລັດຖະມົນຕີປະຈໍາຫ້ອງວ່າການລັດຖະບານ, ຫົວໜ້າ ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ, ມີບັນດາທ່ານຫົວໜ້າ-ຮອງຫົວໜ້າຫ້ອງການ, ຫົວໜ້າກົມ-ຮອງກົມ ແລະ ບັນດາທ່ານຫົວໜ້າ-ຮອງຫົວໜ້າ ຫ້ອງການ ຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກ ທີ່ມາຈາກສູນກາງ ແລະ ທ້ອງຖິນ ໃນຂອບເຂດທົ່ວປະເທດ ເຂົ້າຮ່ວມຢ່າງພ້ອມພຽງ.​

​ເຊິ່ງຈຸດປະສົງ ຂອງກອງປະຊຸມໃນຄັ້ງນີ້ ເພື່ອພ້ອມກັນຄົ້ນຄວ້າ, ປະກອບຄໍາເຫັນ ໃສ່ບົດສະຫຼຸບ ການຈັດຕັ້ງປະຕິບັດ ວຽກງານກໍ່ສ້າງຮາກຖານ ການເມືອງ, ພັດທະນາຊົນນະບົດ, ລຶບລ້າງຄວາມທຸກຍາກ ແລະ ການແກ້ໄຂບັນຫາລະເບີດບໍ່ທັນແຕກທີ່ຍັງຕົກຄ້າງ ຢູ່ ສປປ ລາວ ສົກປີ 2013-2014 ແລະ ທິດທາງແຜນການ ສົກປີ 2014-2015; ຮ່າງແຜນພັດທະນາຊົນນະບົດ ແລະ ລຶບລ້າງຄວາມ ທຸກຍາກ 5 ປີ (2016-2020) ແລະ ຮ່າງວິໃສທັດຮອດປີ 2030, ແຜນຍຸດທະສາດການພັດທະນາ ແລະ ລຶບລ້າງຄວາມທຸກຍາກ ແລະ ແກ້ໄຂບັນຫາລະເບີດບໍ່ທັນແຕກ ໄລຍະ 10 (2016-2025), ການປະເມີນຄວາມທຸກຍາກ ແລະ ການພັດທະນາ ຄັ້ງທີ II (2011-2015) ແລະ ວຽກງານທີ່ສໍາຄັນຈໍານວນໜຶ່ງ ເພື່ອຈັດຕັ້ງປະຕິບັດໃນປີມ້ວຍທ້າຍ ຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ IX ຂອງພັກ ແລະ ແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ກໍ່ຄື ເນື້ອໃນຂອງກອງປະ ຊຸມວຽກງານກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ ທົ່ວປະເທດ ຄັ້ງທີ III. ກອງປະຊຸມຈະໄດ້ດໍາເນີນໄປຈົນເຖິງ ວັນທີ 7 ພະຈິກ2014 ຢູ່ທີ່ສູນຝຶກອົບຮົມຫຼັກ5 (ICTC).​