ທ່ານ ສົມສະຫວາດ ເລັ່ງສະຫວັດ ຢ້ຽມຢາມເຂື່ອນໄຟຟ້ານ້ຳອູ 6

Published on Tuesday, 20 October 2015 04:17
Written by phonexay
Hits: 2373

ໃນໂອກາດທີ່ ທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດການຜະລິດ ແລະ ຈໍລະຈອນ ພ້ອມດ້ວຍຄະນະ ເຄື່ອນໄຫວເຮັດວຽກຢູ່ແຂວງຜົ້ງສາລີ ໃນລະຫວ່າງວັນທີ 19-23 ກໍລະກົດ 2015. ໃນຕອນບ່າຍຂອງວັນທີ 19 ກໍລະກົດ 2015 ທ່ານຮອງນາຍົກລັດຖະມົນຕີ ພ້ອມດ້ວຍ ທ່ານ ຄຳເຈນ ວົງໂພສີ ເຈົ້າແຂວງໆຜົ້ງສາລີ ແລະ ຄະນະ ໄດ້ໄປຢ້ຽມຢາມ ແລະ ຕິດຕາມຄວາມຄືບໜ້າ ຂອງໂຄງການກໍ່ ສ້າງເຂື່ອນໄຟຟ້ານ້ຳຕົກ ນ້ຳອູ 6 ເຊິ່ງມີຄະນະຮັບຜິດຊອບໂຄງການຂອງ ບໍລິສັດ ຊິໂນໄຮໂດຣ ແຫ່ງ ສປ ຈີນ ແລະ ພະນັກງານວິຊາການ ໃຫ້ການຕ້ອນຮັບ.

ການຢ້ຽມຢາມຄັ້ງນີ້, ທ່ານຮອງນາຍົກລັດຖະມົນຕີ ແລະ ຄະນະ ກໍ່ໄດ້ຮັບຟັງການລາຍງານຄວາມຄືບໜ້າຂອງການກໍ່ສ້າງ ຈາກຄະນະຮັບຜິດຊອບ ເຊິ່ງເປັນໂຄງການລົງທຶນຮ່ວມລະຫວ່າງ ບໍລິສັດ ຊິໂນໄຮໂດຣ ແຫ່ງ ສປ ຈີນ ຖືຫຸ້ນ 85 ສ່ວນຮ້ອຍ ກັບລັດວີສາຫະກິດໄຟຟ້າລາວ ຖືຫຸ້ນ 15 ສ່ວນຮ້ອຍ ໃນຮູບແບບກໍ່ສ້າງ, ດຳເນີນງານ ແລະ ມອບໂອນຄືນໃຫ້ລັດຖະບານ (BOT) ໃນໄລຍະສຳປະທານ 29 ປີ ນັບຈາກມື້ຂາຍໄຟຟ້າເປັນທາງການ ເຊິ່ງເຂື່ອນໄຟຟ້ານ້ຳອູ 6 ແມ່ນຕັ້ງຢູ່ເມືອງຜົ້ງສາລີ, ແຂວງຜົ້ງສາລີ, ມີກຳລັງຕິດຕັ້ງ 180 ເມກາວັດ, ສາມາດຜະລິດພະລັງງານໄຟຟ້າໄດ້ 739 ກິກະວັດໂມງຕໍ່ປີ ມູນຄ່າການກໍ່ສ້າງ 383 ລ້ານໂດລາສະຫະລັດ. ມາຮອດປະຈຸບັນ ໄດ້ສຳເລັດການກໍ່ສ້າງຕົວເຂື່ອນ, ໂຮງຈັກຜະລິດໄຟຟ້າ, ອຸໂມງລະບາຍນ້ຳ ແລະ ພວມຕິດ ຕັ້ງຈັກຜະລິດໜ່ວຍທີ 1 ໃນຈຳນວນທັງໝົດ 3 ໜ່ວຍ, ຄາດວ່າ ວັນທີ 10 ກັນຍາ 2015 ຈະສຳເລັດບັນດາວຽກງານກໍ່ສ້າງ ແລະ ຕິດຕັ້ງ, ວັນທີ 15 ຕຸລາ 2015 ເລີ່ມກັກເກັບນ້ຳ ແລະ ຈະພະຍາຍາມໃຫ້ໜ່ວຍຈັກທີ 1 ເລີ່ມຜະລິດໄຟຟ້າ ໃນທ້າຍເດືອນພະຈິກ 2015 ເພື່ອຮ່ວມສະເຫຼີມສະຫຼອງ 40 ປີ ສະຖາປະນາ ສປປ ລາວ ແລະ ອາດຈະເປີດອີກ 1 ໜ່ວຍຂອງເຂື່ອນໄຟຟ້ານ້ຳອູ 5, ສ່ວນຈັກໜ່ວຍທີ 2 ຂອງເຂື່ອນໄຟຟ້ານ້ຳອູ 6 ຈະໃຫ້ເລີ່ມຜະລິດໃນວັນທີ 29 ກຸມພາ 2016 ແລະ ຈະສຳເລັດທັງໝົດ ສາມາດຜະລິດໄຟຟ້າທັງ 3 ໜ່ວຍ ໃນວັນທີ 31 ຕຸລາ 2016 ພ້ອມທັງດຳເນີນທຸລະກິດຂາຍໄຟຟ້າ.

ໂອກາດນີ້, ທ່ານ ສົມສະຫວາດ ເລັ່ງສະຫວັດ ໄດ້ສະແດງຄວາມຊົມເຊີຍ ຕໍ່ນ້ຳໃຈຄວາມຮັບຜິດຊອບສູງຂອງຄະນະຮັບຜິດຊອບໂຄງການ ເຮັດໃຫ້ການກໍ່ສ້າງມີຄວາມຄືບໜ້າເປັນຢ່າງດີ ໂດຍສະເພາະ ການຮ່ວມສະຫຼອງ 40 ປີ ສປປ ລາວ ທີ່ເຂື່ອນໄຟຟ້ານ້ຳອູ 6 ຈະເລີ່ມຜະລິດກ່ອນແຜນການໃນທ້າຍເດືອນພະຈິກ 2015 ນີ້ ອັນເປັນການປະຕິບັດທິດຊີ້ນຳອັນຖືກຕ້ອງຂອງ ພັກຄອມມູນິດຈີນ ທີ່ຖືວ່າລາວ ເປັນຄູ່ຮ່ວມມືຍຸດທະສາດຮອບດ້ານ ແລະ ຍັງສະແດງໃຫ້ເຫັນເຖິງຄວາມເອົາໃຈໃສ່ເພີ່ມທະວີ ມິດຕະພາບ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ສປ ຈີນ.